Nongstoin, Iaiong 09: Ki riew rangbah jong ka thain Nongtrai hapoh jong ka hima Nongstoin kaba kynthup ia ki 20 tylli ki shnong kila pynlong ia ka jingiakynduh lang ban iamir jingmut kumban leh ha kaba khanglad ia ki kam sniew ha ka dong bad ka thain. Ha dien ka jingiamir jingmut la thaw ia Synjuk Ki Nongsynshar Shnong Upper Nongtre (SNSUN).
Ka jingshim ia kane ka ban thaw ia ka synjuk ka dei halor ka nongrim ba Kane ka dong ka thain ka la shah iehbeiñ ha ka liang ka roi ka par bad shah ktah ia ka suk ka sain ha ka imlang sahlang na kiba bun ki kam sniew.Kane ka jingialang ka la iatai ruh halor ka surok kaba long u bud lum ka ioh ka kot bad ka roi ka par.
Hadien ka jingiatai sani halor kiba bun ki mat, kane ka jingialang kala jied ia kine ki nongkitkam ha kaba u Bah Justin Nongkseh u la shah jied kum u president, Bah Endrius Ryntong kum u Secretary ,Vice President Bah Lamphrang Myrthong bad Bah Sanji Myrthong lajied ruh kiwei kiwei de ki nongkit kam ha kaba u Bah Toning Tyrsa kum u nongai buid rangbah.
Ia u Bah Ricky Sohlang la buh kum u ksiang naka bynta ka surok Nongstoin – Maweit – Nongjri Road kaba dei ka Committee synroplang ki synjuk bad seng bhalang kaba la thaw na ka bynta ban dawa na ka sorkar ban pynlong ia kane ka surok kum ka National Highway na Nongstoin sha Nongjri. La ong u Bah Endrius Ryntong ha ka kyrwoh.
