Shillong, Rymphang 08: Ki samla wat kam jong ka South West Khasi Hills District mynta ka sngi kila phah da ka jingthoh sha shongknor jong ka District Selection Committee ban ujor ba ka don ka jingbakla ia ka rukom buh ia ki jingkylli na ka bynta ka kam LDA.
Ha ka shithi kaba ki la phah mynta ka sngi kiba la kam ba ki dei ki nongwat kam na ka bynta ka kam LDA kaba la khot da ka DSC jong ka SWK District bad kane ka jingphah ia kane ka shithi ka long ban kdew ia ka jingbakla ha ka rukom buh ia ki jubab ha ka eksam ba la pynlong ha ka 5th Rymphang 2022.
Ki jingujor kiba ki samla wat kam ki long ia ka rukom buh iaki jingkylli bad ki jubab ban jied ma ki la lap ba ka don ka jingbakla ha kaba don naki jingkylli kim iahap bad kawei ruh ka option ba ki la buh haki kot jingkylli.
Ki jingbakla kila lap ba ki don ha General Knowledge bad ka Mathematics ( Iaki jingbakla la kdew lang haka Xerox copy jong ki kot jingkylli ba la pyndait lang haka Sla kiba bud).
Kine ki jingbakla ki la wanrah ia ka jingbymhun iangi ki samla thep kam (candidates) ba wan thoh exam iaka Written Exam jongka L.D.A ba la pynlong ha katei ka tarik kumba la kdew haneng.
Kumta, lyngba kane ka jingthoh ngi kyrpad rit ba phin leh ei ei halor kane ka bynta da kaba phin pynlong biang ( re-conduct) ia ka Written Exam jong ka L.D.A da kaba phin niew iaka kum ka bym biang bad kaba donkam ban pynjanai iaka.
Ban thep kam , ban ialeh iaki eksamin thep kam bad ka rukom pynlong iaki exam thep kam kiba khuid khlem kino kino ki jingbuh artatien iaki samla thep kam ki sngew ba ki dei ki hok jong ki kum ki samla thep kam bad namar kata ki ngeit skhem ba phin pdiang ia kine ki jingpynsngew.
Ki samla kiba la thoh ia kane ka jingpynshisha bad ki jingkyrpad khnang ba ka District kan long kaba khuid ha ka rukom leh iakano kano ka kam bad ba kan nym don kano kano ka jingthohbria khamtam haka thungkam thung jam.
