Shillong, Nailur 20: Ka shnat ki samla jong ka seng BJP, ia kaba la tip kum ka BJYM mynta ka sngi kala pynlong ia ka jingiakhih shongkyllain mungor ka jong ki ha jan jong ka additional secretariat ban pynrem ia kane ka sorkar MUA-II kaba la ialam da ka seng Congress ha kane ka jylla Meghalaya. Na ka liang jong ka BJP ka kynnoh ba kane ka MUA-II kaba bamsap.
Na ka liang jong u president ka seng BJP Meghalaya State Unit u Bah Shibun Lyngdoh u la ong ba kane ka sorkar kaba la ialam da ka seng Congress hapoh ka jylla kam shym la lah ban trei kam bad u la kynnoh ba ka don ka jingbamsap dei na kane ka daw ba ki hap ban pynlong ia kane ka jingiakhih ka jong ki da kaba shong kyllain mungor.
Ha kane ka sngi ki nongkit kam jong ka shnat ki samla jong ka seng kila ia poi na kylleng ki bynta jong ki lum khasi ban ia shim bynta ha kane ka jingiakhih shong kyllain mungor ha ryngkat ka jingrah ia ki placard kiba don ia ki jingthoh ban pynrem ia kane ka sorkar MUA-II. Baroh kiba la poi sha kane ka jingkhih kila jan kot spah ngut kiba wan ia shim bynta.
Ha kawei na ki jingthoh ba la rah da u wei na ki dkhot jong ka seng BJYM, la thoh ba ki don kam ban ioh ia ka bor ding eltrik baroh 24 kynta bad ha ka dor kaba duna, u wei pat u la rah ka placard ha kaba la thoh na ka jingmang pisa 15% la pyndon kam kaba sah 85% sha ei ka don labuh dak jingkylli.
La don ruh ki jignthoh ha ki placard ba ki kwah ban iohi ba ka dei ban lait na ki kam bamsap ha ka jingthied iaki dawai, la kylli ruh sha ei ka jaka pule doctor, sha kaei ka jaka pule Nos bad sha ei ka jaka pule Engineer bad kawei na ki jingthoh ka ong “ Ngi kwah ia ki kam pynroi ym ia ka bamsap”.
