Jowai, Nailur 07: Ka Jaintia Students’ Union (JSU) ka ka pynpaw iaka jingsngewnguh ia u Vice Chancellor jongka North Eastern Hill University Shillong U Prof. S K Srivastava halor ka jingshimkhia bad
ka jingbat laka kular ha kaba mynta ka sngi 7/9/2016 u la thung (Notify) shi syndon iaka Committee naka bynta ban pyniaid sha khmat ia ki kam ki jam naka bynta sdang noh iaka jaka ai jingpule kaba dei kawei naki tnad Pule jongka NEHU kaba don haka Shnong Wahiajer West Jaintia Hills.
Ia kane ka Committee kaba la thung bad pynbna paidbah mynta ka sngi da u VC la tip kum ka “Task force committee for Community College Wahiajer, Jowai, west Jaintia Hills” ha kaba u Prof. Henri Lamin u la long kum u Chairman jong kane ka Committee ha ryngkat lang kiwei pat ki Professor bad ki engineer jongka Engineering wings/ Dept jong kane ka Skulbah.
Kum ka jingpynkynmaw, kane ka dei kawei na ki mat jingdawa jongka JSU kaba larim bha kaba la sdang naduh u snem 2001 ha ka por ba long President u Charles phawa, bad ia kane ka Tnad pule jongka NEHU kaba la dawa naduh kipor mynshwa la tip kum ka NEHU Compus, hynrei namar ka jingpyndam noh ka Sorkar kmie lyngba ka HRD Ministry iaki Univesity ban plie iaki Compus naduh mynta u snem kumta la hap ban buh noh daka Community College haka jaka ka Compus naka bynta ki jingpule bapher bapher (Job Oriented & Skill Development Courses / Activities) ha ka Shnong Wahiajer West Jaintia Hills.
Ka JSU naka por sha ka por kala iai bud dien ia kane ka mat bad haka 24th August 2016 ki noingialam ka JSU haka jingiadonlang u President bad Vice President ka NEHUSU ryngkat u Prof. H Lamin kila ia kynduh ia u VC ka NEHU u Prof. S K Srivastava ha kaba u la kular ban thung ia kane ka Committee naka bynta ban pyniaid sted ia ki kam ki jam naka bynta kane ka tnad pule kaba la dep mang pisa kumba 600 lakh daka NEHU haka Shnong Wahiajer.
Thik kumba la kular na ka liang u VC u la thung iaka Committee, bad na ka liag ka JSU ka pynpaw iaka jingsngewnguh kaba khraw ia u VC namar ka jingshimkhia ka jongu ia kane ka mat kaban tei iaka pule puthi hapoh ka Rilum Jaintia baroh kawei. Ha ka juh ka por ka JSU ka ai khublei kyrpang ruh ia u Prof. Henri lamin, prof. B marboh bad kiwei kiwei ki professor bad ki riew rangbah bad ki sengbhalang kiba trei borbah ban pynurlong ia kane ka jingangnud jongki paidbah, bad khamtam eh iada dorbar Shnong Wahiajer kaba la ai sngewbha iaka jaka kaba haduh 6.46 hecter naka bynta kane ka jingthmu babha.
Ka JSU ka ai khublei ruh iaki Member jong kane ka Committee baroh naduh u Chairman bad kiwei kiwei, bad kyrmen skhem ba kin treishitom naka bynta ban tei bad tyngrong lem iaka pule ka puthi hapoh kane ka Rilum Jaintia Jongngi kaba dang don shibun ki jingduna ha ka liang ka jingnang jingstad.
