Shillong, Iaiong 03: Katkum ka kyrwoh bala pyllait da ka KSU, lah iathuh ba mynnin ka sngi u Blei kaba dei ka 2tarik, ïaiong 2023 ka lah don ka jingshah thombor ki paid Khasi kiba sah ha ka shnong Khedagor, Manipur.
Lyngba ka video kaba lah ioh ring ha katei ka jaka iakynad ka pyni shai ba ki jaitbynriew Meitei ki lah pyrshang ban ktah kti ia u Naga, ha kaba lah don ruh ka jingiamai ia kajia kaba jur bha hapdeng kitei ki arliang manla.
Katkum u Waheh Shnong jong ka shnong Khasi ha ka Khedagor, Temenglong kaba don ha jylla Manipur, ki dei ki jaitbynriew Bangali kiba ktah ia ki Manipur.
Shuh shuh, lah iathuh ruh ba ki Meitei bad ki Bangali ki pynwit pynthut barabor ia ki jaka rep jong ki paid Khasi ha katei ka shnong bad haduh mynta mynne ki Khasi ki dang im da ka jingsyier mynsiem.
Ha kaba lah don ruh ka jing pynbor ba kin hap ban phetkrad shisyndon sha Meghalaya, Kane ka jingjia thombor ia ki Khasi trai muluk ha ka jylla Manipur ka dang iai jia na ka por sha ka por wat ha kaba lah don ka jing pyntikna jong u Shri Biren Singh myntri rangbah ka jylla Manipur bad ka KSU ha u snem 2022.
Ka jingiakren ka long ba ki Khasi trai muluk kiba don ha katei ka jaka kin ioh ka jingiada na ka sorkar katba ki wei kiba shu sah beaiñ kin shah kyndang lut shisyndon, pynban ki jing long jingman ha katei ka jaka ki lah nang kham sniew shuh shuh ban ia kaba mynshuwa.
Sa shisien biang, ka KSU ka buh jing kyrpad ia ki hymmen ki para kiba dei ki Meitei ba kin pyntikna lem ba ki Khasi kiba don ha ka jylla Manipur ki dei ban im da ka jingsuk jing shong shngaiñ, khnang ba ka jingiadei kaba iajan bha hapdeng ki Khasi bad ki Meitei kan iai neh skhem Shirta.
Haduh kine ki sngi, ka lah don ka signboards kaba lah buh ia ki kyndon jing maham kiba tyngeh da ka tnad khlaw jong ka jylla Manipur kaba khanglad bad maham jur ia ki Khasi trai khyndew ba kin leit ban rep ban thung ha katei ka jaka, hynrei ki Bangali bad ki Meitei ki nang iai shim kabu ban khamtrai ei ia katei ka jaka jong ki paid Khasi.
