Shillong, Naitung 03: Mynta ka sngi ki dkhot jong ka seng HYC kila leit tur kynsan sha Secretariat bad rah ia ki plakard jong ki ban dawa na ka sorkar Meghalaya ba dei ban pyntrei kam ia ka National Register of Citizenship (NRC) hapoh jong ka jylla Meghalaya kumba leh ka jylla Assam.
Ki dkhot jong ka HYC ha ki palkard kaba kila thoh kila dawa ba ka sorkar Meghalaya kala dei ban pyntrei kam noh mardor ia ka NRC ha kane ka jylla, lada ka sorkar kam leh ei ei ka sorkar kan sa mad ia ki jingialeh.
Ha kane ka jingleit rah plakard ha khmat Secretariat mynta ka sngi ki long da ki bun phew ngut ki dkhot jong ka seng HYC. Lah ban pynkynmaw ba ka seng HYC kala dawa na ka sorkar ba dei ban pyntrei kam ia ka IPL ha kane ka jylla ban khanglad ia ka jingwan rung jong ki mynder sha kane ka jylla Meghalaya.
Ia kane ka jingdawa da ka seng HYC ba dei ban leh ei ei na ka bynta ban khanglad ia ka jingwan rung kyrthep jong ki briew kiba na bar kala long naduh ba la seng ia ka seng HYC bad mynta ka sngi ka seng kala leit kynsan ban rah ia ki plakard sha Secretariat ban dawa na ka sorkar ba ka dei ban pyntrei kam ia ka NRC ha kane ka jylla.
U Bah Robert Kharjahrin President jong ka seng haba kren ha u SP News Agency u la ong ba ki paidbah ki dei ban sngewthuh ia ka jingiapher hapdeng ka NRC bad ka ILP, ka NRC ka long ban don ia u snem ot kyrteng bad ka ILP ka long ban iada ia ki mynder kiba wan rung sha kane ka jylla.
Na ka liang jong u nongialam jong ka HYC u la ong ban leh ia kane ka long kaba lah lada ka sorkar ka don ia ka mon ban leh ia kaba la tip kum ka “Political Will” lada ka sorkar jong u Conrad K Sangma bad ka sorkar BJP ha Delhi ki don ia ka mon ban leh ki lah ban leh da kaba pynbna ia ka Ordinance.
Na ka liang jong ka seng kan pynsangeh shuwa shipor ia ka jingiakhih jong ka kin ap ia ka jubab na u myntri rangbah ka jylla bad lada u myntri rangbah ka jylla u sngap ka seng kam ban se ban iaid sha khmat ban pynlong ia ki jingiakhih ban dawa na ka sorkar ba dei ban pyntrei kam ia ka ILP bad ia ka NRC ha kane ka jylla ban iada ia ki rit paid jong ka jylla Meghalaya.
