Shillong, Jylliew 21: Ka AJYWO Central Body ka pynrem jur halor ka jinglehbein jong ka GR Infra Project Ltd ia ka Meiieit Long Shadap, Kuliang East Jaintia Hills da kaba ot khyndew na jan iing jong ka khlem da don ka mynsiem isynei ia u duk u suk bad pyrkhat ia ka jingim jong ka, kat haduh ba katei ka iing jong ka ka la twa bad pra noh syndon pom ha ka 14 tarik mynta u bnai tang na ka daw jong katei ka jingleh torti, khlemakor bad khlem jingisynei jong katei ka company ia ka bapli.
Ka long kaei kaei kaba pynpait dohnud ban tip ba ka Meiieit Long Shadap bapli, ka shait peit sngewsih bad jaw ummat kthang na ka bynta katei ka iing jong ka ha ka por ba ka dang neh synjor na katei ka jingot khyndew khlem pyrskhat jong ka GR Infra Project Ltd na ka bynta ka NH.6. Ka GR Infra Project Ltd ka dei ka company kaba la shim kontrak ban pyntrei pynheh ia u surok NH.6 naduh Sumer, West Jaintia HIlls haduh Malidor, East Jaintia Hills.
“Kat kum ka jingtip jong ka seng, ki bor district, ka Jaintia Hills ki lah jurip lypa bun bun sien ia ki jaka puta bad ruh ia ki iing ki sem kiba lah ban shah ktah na kane ka jingpynheh ia ka surok NH.6 hynrei ngim tip pat de la ki bor district ka jong ka East Jaintia Hills, ki lah dep jurip ne em ia ka iing jong ka Meiieit Long Shadap.
Hato ki la iohi lypa ne em ia ka jingma kaba ap ia ka iing bad ia ka jingim jong ka na katei ka jingpynheh surok, Lada ki lah dep jurip ia katei ka iing, ka ei ki iohi bad kiei ki lad jingiada bad jingiarap kiba ka sorkar lyng ba ka East Jaintia Hills District Administration ki la pynkhreh na ka bynta jong ka tei ka Meiieit bad balei kita ki lad jingiada ne jingiarap ki slem kat haduh ba katei ka iing jong ka ka la khyllem mynta”. Don bok ba ym shym la don ka jingjia ba sngewsih ha katei ka jingjia”, ong u Bah M H Dkhar, President jong ka AJYWO Central Body.
Kumta, halor katei ka jingjia ia ka iing jong ka Meiieit Long Shadap, ka AJYWO ka dawa na ka Company bad ki bor District ba ki dei ban shim ia ka jingbah khlieh da kaba ai jingiarap kloi ia itei ka Meiieit ha ka rukom kaba biang bad shongdor kat kum ka jingduhnong jong ka.
“Ka East Jaintia Hills ka dei ka jaka lum. Ha kiba bun ki bynta jong ka jingpynheh ia ka surok NH.6, khamtam ha ki thaiñ Narpuh Elaka, ka long da kaba hap ot ia ki katto katne ki bynta jong ki lumbah bad ha ki ba kum kine ki bynta kynthup khamtam eh ia ki jaka ba long-shnong, ka company bad ki bor district ki dei ban da husiar bha bad leh janai bah, khnang ba kan ym wanrah ia ki jingjia ba sngewsih hadien habud da ka jinglah ban twa khyndew ha kano re kano ka por khamtam ha ka por lyiur ba jur slap” La bynrap biang u Bah M H Dkhar.
Ka seng ka dawa ruh na ki bor District jong ka East Jaintia Hills ban shim khia halor kane ka bynta khamtam ia kito ki long iing ba don ha ka jingma mynta na katei ka jingshna ia ka NH.6, kiba lah dep ujor lypa sha ka District Administration, kum ka iing jong u Ma Wanmon Suchen, ka iing jong u Ma Wing Thamar bad kiwei kiwei de.
Ka seng ka dawa ruh na ka GR Infra Project Ltd ba kam dei ban leh torti halor ka jingshna ia u NH.6 hynrei ka dei ban da peit bha bad leh janai halor ka jinglong shngaiñ jong u paidbah na ka jingpynheh ia une u surok khamtam ha ki bynta ba la long-shnong, khnang ban lait na ki jingjia ba sngewsih hadien habud.
Halor katei ka jingjia ia ka iing ka Meiieit Long Shadap, lada ki bor ba dei peit kim leh ei ei, ka seng kan sa hap ban leit rah ia kane ka bynta sha ka Ministry of Road Transport and Highways bad kiwei kiwei de ki bor ba dei peit ia kane.
