Shillong, Iaiong 14: Ka seng HANM jong ka shant Ri War Mihngi lyngba u President u bah Shaibor Nongrum kala pynrem jur ia ka jingpyntrei ia ka sorkar ha riad Rngian kaba la wanrah ia ka jingiap jong u briew ha kthain ha ka jingtwa ki maw bad ban ia ki kali kiba iaid na kane ka surok ban leit sha Pynursa.
U bah Shaibor Nongrum la ong ba wat ka kompeni kaba pyntrei ia katei ka surok kala sangeh ban trei namar ka dang peit bniah kumno ban leh bad kala maham ruh ia u bah Tensing bala pyntrei ia ka surok ba ym dei ban dang bteng ia ka jingtrei hynrei u la pyntrei wat hapdeng ka jingshah mana, la kynnoh u President ka HANM Ri War Mih ngi.
Ka jingtwa ka lum ha riad Rngian kala jia mynta ka jan meit hapdeng 6 bad 7 baje, ha kane ka jingjia ki don ar tylli kiba la shah pynjulor, kawei ka sumo bad kawei ka maruti, kaba la shah ban ha ki mawbah dei ka Maruti jong u bah Seiborlang Jaktung rangbah shnong ka Wahlyngkhat.
U Presdient ka HANM jong ka Ri War Mih Ngi u la ong ba la suba ba ha ka kali u bah Seiborlang kaba dei ka maruti ki don ar ngut bad haba peit na ka jingshah ban ha ki mawbah ym ithihkna shuh ba kin dang im bad ki shem ba kila khlad ha kane ka jingjia kaba sngewsih.
Ka seng ka dawa ba ka sorkar ka dei ban phah siew ia ka jingjulor ha kiba pyntrei ia kane ka surok kaba la leh palat haduh ba kala wanrah ia kane ka jingiap briew, kat haduh ba thoh ia kane ka khubor ka jingialeh ban sei ia ki met ka dang iaid bad haduh mynta ym pat tip katno ngut kiba khlad.
