Shillong, Jylliew 25: Mynta ka sngi kala don ka jingiakynduh hapdeng ki nongkhaii na ka Ri Canada bad ki dkhot jong ka Meghalaya State Planning Board. Ha kane ka jingiakynduh kila ia kren kumno ban ia treilang ha kaba yn ia kyntiew ia ka khaii pateng hapdeng ka sorkar na Canada bad kane ka jylla Meghalaya.
Kane ka kynhun nongkhaii na Cananda kala ong ba kane ka jylla Meghalay ka don shibun ki lad ki lynti kaba ki lah ban ia trei bad kane ka jylla, ha kiba bun ki liang, ha ka liang lat pathai khubor, ka rukom pynkhuid ia ka umbam umdih, ban pynioh jingmyntoi na ki jaboh kiba mih na ka mariang, ha ka liang ri jingri bad ka rukom shna surok ha ka dor kaba tad.
Haba ia dei bad ki kor ki bor ban pyndon kam ha ki jaka tih marpoh khyndew katei ka kynhun kala ong ba ka Ri Canada ka pynmih ia ki kor ki bor kiba rem dor hynrei kiba bha katkum ka jingdon kam ha ka par.
La ong ba tang ka ka Saskatchewan marwei ka shallan sha ki ri jong ka pyrthei ia ki musli musla kala kot sha ka 20 billion dollars tang hapoh jong ka Ri India ka jingshallan ia ki musla na katei ka Ri kala poi sha ka shi billion dollars.
Kane ka kynhun na Canada kala khot sngewbha ia ki dkhot jogn ka MSPB bakin leit sha katei ka ri ban peit hi da la de ia ki kor ki bor kaba ki pynmih na katei ka Ri ha ka liang ka rep ka rang bad ka ri jingri. Kane ka kynhun kan sap hah ia ki jigntip kiba bniah sha ka MSPB.
Ha kane ka jingiakren na ka liang jong ka MSPB la lam khmat da u Chairman SC Marak lem bad ki dkhot jong ka Board bad na ka liangjong ka Ri Canada la lam khmat da u Arjun Kumar Dutta, Trade Commissioner, Kolkata, bad u Mortoza Tarafder, Director Trade Development South Asia, MENA, na Saskatchewan Trade & Export Partnership.
Ha kane ka jingalang kila batai ia kiba bun ki kam kiba ka Ri Cananda ka kwah ban leh ha ka liang pynmih bor ding naduh ka Hydro, Solar, bad na u nuclear lane na u Uranium.(SP News)
