Shillong, Jymmang 19: Ka Meghalaya Peoples Human Rights Council (MPHRC) ka pynrem jur ïa ki san ngut ki pulit kiba dei u C. R. Marak uba dei u Sub-Inspector, u Balbring G. Momin, u Pynshangbun Shangpliang, u Mathius Marak bad u Solomon R. Marak kiba dei na ka kynhun SF- 10 jong MLP ka 3rd Battalion Nonghyllam Anti Dacoity Camp South West Khasi Hills halor ka jingkynnoh ba ki la donkti ban shoh pynmynsaw ïa ki lai ngut ki khynnah skul ka Jingaiti Higher Secondary School Nonghyllam bad kiba kyrteng u Phaskupar Nongtnger na ka shnong Umsur, u Manlyness Marngar bad u Manbha Hahshah na ka shnong Nonghyllam kiba dang hapoh ka 18 snem ka rta.
“Ka jingshoh pynmynsaw ki pulit ka dei ka kam bym kheiñ briew shuh bad ka jingpyndonkam bakla bad shim ïa ka aiñ ha ka kti lajong khamtam ban shoh khlem nongrim ïa ki khynnah bad namarkata dei ban ai ka jingpynrem ka jur na baroh ki liang” ong u Bah N.John Nongrem Vice Chairman ka MPHRC.
“Naduh mynno la ai bor ïa ki pulit ba ha ka kyrteng jong ka aiñ ki lah ban tied bad bom pathar ne shoh pynmynsaw ïa ki briew kat kaba ki sngewbit? U Director General jong ka tnat Pulit ka Jylla U S.B. Singh I.P.S., bad u Superintendent of Police ka South West Khasi Hills U Bah Herbert Lyngdoh, M.P.S., ki dei ban shim ïa ka jingkitkhlieh bad jubab ïa ka daw jong ka jingshah pynmynsaw kita ki khynnah skul ha ka kti jong ki pulit” ong ka MPHRC.
Ka MPHRC ka dawa namarkata, ba ka Tnat Pulit ka dei ban kem mardor ïa kitei ki pulit kat kum ka ejehar ba la buh pyrshah bad dei ban sloit kam noh mar mar shwa shipor ïa kitei ki pulit kiba la shah kynnoh donkti ban shoh pynmynsaw ïa ki lai ngut ki khynnah skul, lym kumta na ka liang jong ka Council kan shim ïa ka sienjam wat bad ujor pyrshah ïa kane ka kam bymman wat ha ka Ïing Kashari. Ong u Bah N,John Nongrem Vice Chairman, MPHRC.
