Shillong, Lber 16: U Myntri Rangbah ka jylla u Cornad K Sangma haba jubab ia ka mat iakren kaba la wanrah da u bah Lambor Malngiang halor ka khubor kaba la mih ha u SP News Agency, kaba la thoh “Ka jingiakren pud kam pat dep la wan sieh Mawpud ka Assam ha wah Umshru Ri Bhoi District”.
U Myntri Rang ka jylla la pyntip hapoh ka iing dorbar thawain ba u la kren bad u mytnri rangbah ka jylla Assam bad ha kaba u la ai ka jingkular ban phah phut ia baroh ki mawpud kiba la thung da ka tnad survey ka Assam.
Na ka liang jong jylla Assam la ong ba kine ki mawpud kin nym don jingiadei ei ei ruh bad ka kam pud kam sam hapdeng kine ki ar tylli ki jylla, bad na ka liang jong ki Chief Secretary kine ki ar tylli ki jylla ruh kila ia kren halor kane ka kam.
Na ka liang jong u myntri rangbah ka jylla la ong ba ia kane ka kam la iakren ruh hapeng u Deputy Commissioner jong ka Ri Bhoi bad u DC ka kamrup Rural bad la don ruh ki briew ka sorkar ba kin peit ban nym don kano kano ka jingjia bad la aiti ha ki opisar ba peit bniah.
U Mytri Rangbah la ong ba ka shnong Umshru ka hap hapoh jong ka Baridua bad na ka liang jong u myntri rangbah ka jylla Assam u la pynpaw ba um don jingtip ei ei ruh em ha kaba ia dei bad kane ka jingjia. Na ka liang jong ki ar tylli ki jylla ki kwah ban don ka jingiadei kaba jan bad ban peit ba kum kine ki jingjia kin nymjai ha dien ha bud.
Haba wanrah ia kane ka mat ia kren, u bah Lambor Malngiang la ong ba kane ka jingwan sieh mawpud ka Assam kan wanrah ia ka jingbym ia shaniah, la kyntu ia ka sorkar ba ia kane ka jingjia dei ban pyntip sha ka tnad kam poh iing ka sorkar pdeng la ong ba ka sorkar ka dei ban seng noh ia ka Meghalaya Regiment ban buh ia ki ha khappud bad ka jylla Assam.
