Shillong, Rymphang 03: Ka Jaintia Students’ Union (JSU) War Jaintia Circle ba la ialam da u President u Eddy Kery Pohtam ha ryngkat ka chnat treikam ka jong ka ka JSU Syndai Unit ha ka jingialam u President u Pynshailang Suliang bad u General Secretary u Heiplan Tariang ki la leit ban ujor sha u Executive Engineer ka Jowai South Division PWD (Roads) bad u Assistant Engineer Border Roads Sub – Division PWD(Roads).
Kane ka jingujor ka long halor ka jingsniew palat ka surok bad ka jingsator ki jingkieng ban dawa ban shna noh ia ka jingkieng ha Wah Lakroh kaba don ha ka surok Muktapur-Borkhat ha kaba ia kane ka jingkieng RCC structure ka la urpait noh ha ki bynta ba kut jong ka.
Ka seng ka dap da jingsngewlyngoh ba kumno ka jingkieng ka ba la shna na ka bynta ban neh haduh 100snem ba ka la sdang pyni ia ki dak ki shin ka jingsynjor. Ka seng ka pynpaw ruh ba ia kane ka jingkieng lah iieh bun snem khlem da don kano kano ka jingpynbha ia ka kum ha ka ban ai rong ne kino kino ki jingpynbha pynmiat ia ka.
Watla hadien ki dak ka jingurpait ruh mynta la bun bnai ka PWD kam pat shim lah leh ei ei tad haduh mynta ki sngi. Ka seng ka sngew dei ba dei ban don ka jingtohkit kaba bniah halor kane ka jingsynjor khlem pat dei por kane ka jingkieng.
Ka JSU ka sngew bynniaw khamtam eh namar kane ka jingkieng ka long kaba donkam eh na ka bynta ki briew jong ka thain RI War Jaintia bad ruh kaba pyniasoh ia ka West Jaintia Hills District bad ka East Jaintia hills district bad khamtam eh kan buh jingeh ia ki nongrep lada ka nang kham urpait shuh shuh ha kaba ki mar rep ki jong ki kin shah ktah na ka jingbymlah ki kali ban iaidiaid na shiliang sha shiliang ka Wah Lakroh.
Kumjuh ruh ka JSU syndai unit ha ka jingiakynduh bad u AEE Border Road sub- Division ki la dawa ban shna ruh ia ka jingkieng dieng ha Wah Amalokodo kaba don hajan ka shnong Muktapur kaba dei ka bynta jong ka surok Muktapur-BorkhatMuktapur-Borkhat kaba mynta ki dieng ki la sdang ban pyut bad synjor.
