Shillong, Nailur 15: U myntri ba deipeit ia ka tnad Revenue bad Disaster Management jong ka sorkar jylla u Dr RC Laloo haba jubab ia ka jingkylli kaba la wanrah da u bah Phlastingwell Pangniang MLA jong ka seng HSPDP halor ka map jong ka jylla Meghalaya, na ka liang jong u myntri u la ong b aka sorkar kala ujor ia ka Map jong ka jylla Meghalaya kaba la pynmih ha u snem 2009 da ka tnad Survey jong ka Ri India.
Haba u MLA jong ka Rambrai u la kwah ban tip hato ka sorkar jylla ka don ne em ia ka map jong ka jylla na ka liang jong u Dr Laloo u la ong ba ka sorkar ka don ia ka map bad u la ong ruh ba un sa phah sha ka ophis jong u shongknor jong ka iing dorbar ia kane ka map.
Haka juh ka por na ka liang jong u myntri u la ong ba ia kane ka map kaba ka sorkar ka don, ym shym la shon ban die paidbah, la pyndon kam ka tang na ka bynta ki kam sorkar, namar ha kane ka map ka kynthup lang ruh ia kito ki jaka kiba don hapdeng ka jingiakam kaba mar kylliang hapdeng ka jylla Meghalaya bad ka jylla Assam.
Ia kane ka map kaba ka sorkar Meghalaya ka don la pdiang da ka cabinet ha ka 24th 11.2010 bad ia kane ka juh ka map ka sorkar Meghalaya kala phah sha ka sorkar jong ka jylla Assam ban pynksan ia ka jingkam na kane ka jylla ha ki 12 tylli ki jaka kiba ka sorkar Meghalaya ka kam ba ki hap ha kane ka jylla.
