Shillong, Jylliew 21: Ka seng samla pule ka Khasi Student’s Union mynta ka sngi kala leit ban wah noh da ka kyrteng “Central Agricultural University” ha ka jaka pule “College Post Graduate In Agriculture Science” kaba la thoh Imphal.
Ka KSU kala pyndam noh ia ka kyrteng bala thoh ha ka signboard jong katei ka Colelge kaba don ha Kyrdem Kulai bad kala wah da ka jingthoh kaba kila thoh “ Central Agriculture University, Kyrdemkulai Ri Bhoi District Meghalaya.
Na ka liang jong ka KSU ka leh ia kane ban pynpaw ia ka jingsngewbitar namar kane ka jaka ka dei ban long ka University ym tang kum ka College namar ka sorkar Meghalaya ruh kala shim haduh 200 akar ka jaka ban tei ia ka University, hynrei kaba pynlyngoh ka long ba ka kylla College.
Haba kren ha u SP News Agency u General Secretary jong ka seng KSU u Samla Donal V Thabah, u la ong ba ka jingleh jong ka seng bad ki trai shnong ryngkat ki trai jaka mynta ka sngi ban leit wah ia kine ki banar ha katei ka jaka pule ka long ban pynpaw ia ka jingpyrshah ba kalei kan long tang ka College haba ka dei ka Univeristiy.
La iathuh ba na ka liang jong kane ka sorkar jylla mynta kala shim khia ia kane ka kam bad u myntri ba dei peit ia ka tnad rep u Bah Banteidor Lyngdoh u la ia kynduh ia u myntri ka tnad rep jong ka sorkar pdeng ban ia kren halor kane ka jaka pule, hynrei ia kaei kaba mih na ka jingiakren kim pat ioh jingtip ei ei.
Na ka liang jong u Bah Vincent H Pala MP hapoh Lok Sabha u la rah ia kane ka jingkylli hapoh iing dorbar bad kum juh ka Kong Wansuk Syiem MP hapoh Rajya Sabha ruh kila kren. Na ka liang jong ka seng kan nym lah ban pdiang ia kane ka jingleh ba ha ka jaka jong ka University yn buh da ka Cillege.
