Shillong, Risaw 10: Ka seng lehnoh GNLA ha Garo Hills kala nangtroin da ka jingwan pyndem noh jong u Anjan Ch Momin u wei na ki dkhot u ba la rim tam jong ka seng u ba la bat ia ka kyrdan Surgeon ha kane ka kynhun lehnoh.
Ha ka kynhun lehnoh GNLA ia u Anjan la tip kum u Jimmy, mynta ka sngi ha ka por kumba 12.30 nohphai sngi, ki pulit jong ka East Garo Hills kila pdiang ia u tei u nongialam jong ka seng u ba la kloi ban pyndem ia lade ha khmat jong ki pulit.
Ha kane ka jingwan pyndem u la aiti ruh ha ki pulit, kawei ka suloi AK-47, 86 tylli ki kuli kiba khlem pat pyndon kam, kawei ka Walky-Talky ryngkat ka mobile kaba u juh pyndonkam. Da kane ka jingwan pyndem jong une u nongialam jong ka seng GNLA kala pyntroin shuh shuh ia kane ka seng lehnoh.
Dang ha kine ki sngi u Zen Roberth CH Marak u ba bat ia ka kyrdan Deputy C-In-C hapoh jong kane ka seng lehnoh u la leit ban pyndem ha khmat jong ki pulit ryngkat u nongbut jong u.
