Shillong, Nailar 14 Ka Young Talent Badminton Club Mawlai Mawdatbaki ( YTBCMD) ka la ai burom ia ki khynnah ka shnong kiba la wanrah burom lyngba ki jingjop ha ka 32nd Meghalaya State Badminton Championship 2014 naduh 7 haduh 9 tarik mynta u bnai Nongpoh, Ri Bhoi District.
Ka seng ka la ong ba ka dei ka sien kaba nyngkong eh ba kitei ki khynnah ki la khur jingjop na ka bynta ka klob, kaba dang shu seng thymmai hapoh ka jingai jinghikai u Bah Sunny B. Warjri ( PTI) uba la shah thung kum u Community Coach ha ryngkat u rangialehkai u Suba Pyngrope ha ka sorkar jylla.
Ha katei ka lympung miba la ioh ban khur ia ka jingjop ki long u Kiefer Wilson Shullai ha ka Boys Single U- 19 bad u Asdrew Lotzem ha U- 12. Kiwei pat kiba la wan ba ar ki long ka Larihun Warjri, u Suba Pyngrope & Larihun Warjri, Kiefer Wilson Shullai & Kynsai S M. Umlong U- 19), Cherly Mawlieh U- 19 bad ka Cherly Mawlieh U- 17.
Ka klob ka la ai burom ruh ia ki kmie ki kpa kiba la noh synñiang kiba la kloi ban phah ia la ki jong ki khun ban shah ai hikai. Ha kajuh ka por ka klob ka ai khublei ia baroh kiba la noh synñiang ia ka klob ha ka liang ki tiar ialehkai, khamtam ia u Bah G. E. Lyngdoh,
District Sports Officer East Khasi Hill uba la ju kyrshan bad ai mynsien na ka por sha ka por.
Ka klob ka la pyntip ruh ba lada don kino kino kiba kwah ioh ka jinghikai badminton kiba hapoh 15 rta, ka por ai jinghikai kan long naduh ka por 4: 39 janmiet lane ki lah ba phone ia u Secretary ha No. 8014- 243140 ha indoor Sports hall Mawlai Mawdatbaki.(SP News)
