Shillong, Jylliew 11: U bah Pyrwa Lymba u Dalloi ka Elaka Darrang Dalloiship kaba hap hapoh Amlarem sub division jong ka West Jaintia Hills District, la mana tyngeh ia ki paitbah kiba ju wan khwai lane wan jngohkai sha kane ka Elaka kaba don ia ka wah Umngot, khlem da pyntip shuwa sha ki nongpeit ka Elaka ha shuwa ban wan.
Kane ka jingpynmih ia kane ka hukum, ka long kum shi bynta ban iada na kane ka jingsaphriang une u khniang Covid-19 sha kane ka thain bad ruh ban pyrkhing na ka jingwan rung kulmar ki briew khlem ka jingpyntip kaba biang, la kiba shisha ne ki hym shisha, namar kabuh jingeh shibun ia ka Elaka.
Namar katta, u Dalloi kane ka thain u kwah ban ialeh pyrshah ia kine ki jingsniew bad ki jingpynjulor ia kane ka wah kaba hap hapoh ka jingpeit jingkhmih ka jong u kum u Dalloi hapoh kane ka Elaka jong ka District Council , bad khamtam ban ai ka jingiada ia ki paitbah ban lait na kane ka jingsaphriang une u khniang Corona virus sha kane ka thain.
U Dalloi u kitbok kitrwiang ruh ia ki paitbah ka thain ba kin im ha ka jingtrei minot khop ia ka kam ban ioh ia ka jingkoit jingkhiah kaba dei ka dawai bah na ka bynta ka jingim jong ngi ki briew. Namarkatta, law kyrpad ia ki paitbah kiba najan bad na sha jngai ba kin sngewbha ban phone shuwa ha une u No 8132096302, shuwa ban wan sha kane ka wah Umngot.
