Jowai Nailar, 03: Ka Dorbar Shnong jong ka Shnong Wapungskur, ka ba la long ha ka 29 tarik u July, 2014, ka la weng noh shisyndon ia u Ma Hamlen Rymbai na ka shuki President jong Wapungskur Sports & Welfare Organisation bad ha ka jaka jong u la pynkiew kyrdan noh ia u Ma Madly Ryngkhlem Vice President kum u President ba thymmai bad ba pura jong ka WSSWO bad ruh la jied ia u Ma Pynhunlang Sari kum u Vice President jong ka WSSWO. Kine baroh arngut kin trei pynkut ia ka samoi treikam jong ka WSSWO kaba dang sah.
Ka daw jong ka jingweng jyndat noh jong ka Dorbar Shnong Wapungskur ia u Ma Hamlen Rymbai na katei ka kam President jong ka WSSWO ka long halor ka jingmih ki kynrum kynram ha ka kam pisa pilain ha ka jingpyniaid jong u ia ka Gold Cup Wapungskur bad ruh kiwei kiwei de ki kam kum ka jingbym pyndonkam hok jong u ia katei ka office kum u President jong ka WSSWO.
Kumta naduh nangne sha khmat, ha ki jingiadei kam baroh bad ka WSSWO, ki paidbah kin sngewbha ban contact ia u President ba thymmai jong ka WSSWO, u Ma Madly Ryngkhlem hynrei ym shuh ia u Ma Hamlen Rymbai.(SP News)
