Shillong, Rymphang 19: U nongshim wai ia ka jingkieng thew ne weight Bridge ha Amsarin, Sohkha Model, ka surok Jowai-Dawki, West Jaintia Hills, ula sah ha ka lyngngoh hadien ba ki trok kit mawshun kim treh wan thew shuh ha katei ka jaka bad, ki leit thew ha kawei pat ka jingkieng weight bridge kaba dang shu buh dang shen.
Katei ka jingkieng thew ka don tang kumba shiten kilometer eiei na ka jaka ba don ka jingkieng thew kaba la don lypa.Ia ka weight Bridge ha Amsarin, la shim wai u bah Deipormi Dkhar na ka tnad Transport Department ka sorkar jylla ha u snem 2016 bad la pynthymmai biang ha u snem 2022.
Haba kren sha ki lad pathai khubor, ki nongtrei jong kane ka weight bridge kynthup u bah R Khonglah bad kiwei, ula iathuh ba ka sorkar jylla kala pyrshang ban khang jubor ia kane ka weight bridge hynrei na ka liang, u nongshim wai ula ujor sha ka High Court, Meghalaya bad ka High Court, kala pynmih ia ka hukum ban pynksan ia u nongshimwai.
Ula iathuh ba kaba lyngngoh ka long ba wat haba ka High Court kala pynksan ia u nongshim wai hynrei ka sorkar kala plie ia kawei pat ka weight Bridge kaba don kham pajih na katei ka jaka hi bad, kala rah lut ia ki nongtrei kynthup na ka Directorate of Mineral Resources (DMR), ka Transport Department bad ka Forest ruh kumjuh bad namar kane ka daw, ki trok kit mawshun kim leit thew shuh ha katei ka weight Bridge namar ba kim don shuh ki nongtrei jong kitei ki tnad sorkar.
U bah Khonglah ula kynnoh ba kane ka dei ka jingiuhroit bad ka jingthombor ia ka hok jong u nongshimwai bad ym banse ban leit pyntip biang sha ka kashari halor kane, bad kyrmen ba kan ai ia ka rai kaba hok kaba shisha.
“Ngin leit ban pyntip biang sha ka High Court halor kane ka jingshah iuhroit, ka jingshah thombor kaba long ruh kum ka jingpynkhein ia ka hukum ka kashari ba don burom”, la ong bah R. Khonglah.
Ula ong ba kumno lah ban plie sa kawei ka weight Bridge ha kajuh ka jaka khamtam haba tang ka jingiateh bad u nongshimwai ruh kam pat kut. Katkum ka jingiathuh, u bah R. Khonglah, ka jingiateh u nongshimwai bad ka sorkar jylla kan kut ha ka 31 tarik Jymmang 2025.
U bah R. Khonglah, ula ong ba ha ka shithi kaba la phah u Commissioner ka tnad Transport sha u nongshimwai u bah Deipormi Dkhar kaba 16 tarik Kyllalyngkot 2024, ula ong ba katkum ka rai ka High Court, Meghalaya kaba 8 tarik Nohprah 2023, katkum ka mukotduma WP ( C ) No.299, ka sorkar kala weng noh ia ka jingiakhun ia ka mukotduma.
La iathuh ba katei ka weight Bridge thymmai, ka dang treikam naduh ba mih mynta u bnai Rymphang 2024, bad shwa ban plie ia katei ka weight Bridge thymmai, kam shym la don kano kano ka jingpyntip ne ka jingthoh na ka sorkar sha u nongshimwai ia ka weight Bridge kaba don mynta, bad kane ka paw ba la shu leh thombor ia ka hok jong u nongshimwai.
Kumba 150 haduh 200 tylli eiei ki trok kit mawshun na katei ka thain ki hiar ban leit pynhap sha Bangladesh. Ka kynhun ki nongthoh khubor kiba hiar sha katei ka jaka, kila sakhi ba da ki spah tylli ki trok ryngkat u mawshun smam, ki hiar sha Dawki ban shalan sha Bangladesh.
Ha kajuh ka por, ula ong ba ka jingbym treh wan thew shuh ki trok ha katei ka weight Bridge, ka la buh jingeh ba kin leit siew sha ka sorkar kumba ka iateh bad kumjuh ban siew ia ka bai nong ki nongtrei.
