Shillong, Lber 23: Ka iing dorbar thawain ain jong ka jylla kala wengnoh ia ki jingkynnoh pyrshah ia u ophisar jong ka sorkar jylla u Zenithsku J Sangma CEO jong ka Tura Municipal Board ha dien ba u la pan map ha khmat jong ka iing dorbar thawain mynta ka sngi.
Kane ka jingrah ia u tei u ophisar jong ka sorkar jylla ha khmat jong ka iing dorbar thawain ka jylla ka long ba u la pynkhin ia ka hok jong u MLA, ia kane ka jingujor sha ka privilege committee jong ka iing dorbar thaw ain kajylla la ujor da u MLA jong ka Tura South u John Leless K Sangma ia kaba u la ai ka jingujor pyrshah ia utei u ophisar ha u snem 2014 ha kaba ia dei bad ka jingjia ha Iew Ringrey ha Tura.
Na ka liang jong u CEO jong ka Tura Municipal Board u la pyrshang ban kdew ia u MLA jong katei ka jaka ha kaba u la ong ba dei u MLA u ba la pynmih ia ki kyunrum kynram kane ka long ka nongrim ba u MLA u la ujor pyrshah ia u tei u ophisar hapoh ki kyndon pyniaid ia ka iing dorbar kaba 172 bad halor kane na ka liang jong u shongknor jong ka iing dorbar la wanrah ia une u ophisar hapoh ka iing dorbar.
U CEO jong ka Tura Municipal Board u Zenithsky J Sangma la wanrah ha khmat jong ka iing dorbar mynta ka sngi ha kaba u la pan map na u MLA jong ka Tura South, na ka privilege committee bad na ka iing dorbar. Ia u la wanrah da u marshal jong ka ing dorbar ha ka bar kaba la buh ha poh ka iing dorbar.
Shuwa ban ai ia kano kano ka rai, u shongknor jong ka iing dorbar u AT Mondal u la bethah ia u ophisar jong ka sorkar ba um pyndem ia la de ha khmat jong ka iing dorbar bad phah ban shim ia ka jingsmai namar ka iing dorbar kala ai ia ka rai ba u la pynkhein ia ka hok jong u dkhot jong ka iing dorbar u John Leslee K. Sangma, bad na ka liang jong u ophisar jong ka sorkar jylla u la pan map ha khmat jong ka iing dorbar.
Ha dien ba la dep ban pan map da u ophisar ha khmat jong ka iing dorbar u myntri rangbah ka jylla u Dr Mukul Sangma u la ong ba kum kane ka jingjia ka dei ka sien kaba nyngkong ha dien jong u snem 1973, hooid kila don ki jingshah khot jong ki ophisar hynrei ha u snem 1973.
U myntri rangbah kajylla u la ong “ to ai ba kane ka jingjia kan long ka jinghikai ia baroh ba ki dei ban sngewthuh ia ka bor jong ka iing dorbar kaba la pynkup ha ka”, Ha dien ka jingkren jong u myntri rangbah u shongknor um shym la shah iano iano ban kren, hynrei la shah ia u ophisar ba un leit noh ha dien ba u la dem languh ia u shongknor, ia ka liang synshar bad ia ka liang pyrshah.
Ha shuwa jong kane katba dang phah wanrah ia u ophisar hapoh jong kane iing dorbar, u MLA jong ka NPP u James K Sangma u la pyrshah ia kane ka jingleh ha kaba u la ong ba khlem da peit ia kaba dei ne kaba lait jong kane ka jingjia, u la ong ba um kwah ban iohi ia kane ka jingshah hajir jong u ophisar bad u la mih noh na ka iing dorbar ha kane ka por ba khot hajir ia u ophisar.
Naka liang jong u shongknor jong ka iing dorbar u la ong ba ia kane ka jingong jong u MLA ym lah ban pdiang namar ba ha ka por ba wanrah ia kane ka Privilege Motion ym shym la ong ei ei bad ka iing dorbar kala pdiang ia kane ka rai.
