Jowai, Naiwieng 06: Ka Jaintia Youth Federation JYF Sengkmie, kam da lah ban shu peit ne sngap jar ia kaei ba la jia ha Ri lum Jaintia ha kine ki sngi ba la lah. Kum ka seng kaba peit ia ka bha ka miat ka roi ka par ka shongsuk shong sain bad khamtam eh ka jingia long shitylli kawei kum ka Jaidbynriew rit pait kaba don shibun ki lad ban thawdur thymmai ia ki ba bun rukom ki jingmyntoi da kaba teh song lyngba ki ain Dustur kiba long ka Riti shynshar jong ka District Council na ka bynta ki trai muluk kiba don ha la ki jong ki Elaka.
Ka JYF, da ka jingsngewkhia mynsiem ia ki jingjia shah wengkam shipor ki Daloi kiba dei ki khlieh nongsynshar ka Ri lum Jaintia, ba ki la kum iaid lait lane leh bymsuidniew ia ka kmie (JHADC) jong ki, kaba peit bad sumar ia ka rukom synshar Elaka jong ki katkum ki kyndon ba la pynkup bor ha ki da ka District Council.
Katkum ka Dustur bad Riti ba la don shwa naduh ka mynnor ha shwa ban kha ia ka District Council, ka jaidbynriew hynniewtrep ka ai bor ia ki Daloi, ki syiem, bad ki Sirdar ban long ki nongsynshar Elaka bad Hima. Kum ki nongialam kiba don jingkitkhlieh ban peit iala ka Hima lane Elaka katkum u pud u sawdong ba ki don ka iktiar ban hukum ia la ki jong ki pait ban kohnguh ia ka rai ban siew bai musur sha ka ophis u syiem lane Daloi na ka bynta ki jingdonkam jong ka Hima lane Elaka.
Hynrei naduh ba la mih ka United Khasi – Jaintia Hills District Council, kaba la ioh jingmynjur ha ka 23rd July 1960 na u Lat jong ka Assam, la aibor noh da ka Six Schedule ia ki District Council ban peit bad sumar ia ka khyndew ka shyiap, ki Elaka bad ki hima. Ki Syiem ki Daloi bad ki Sirdar baroh ki hap noh hapoh ka jingkhmih jong ka Council ryngkat ki kyndon ain kiba teh ia ki.
Ka jingmih ki jingia shrut hapdeng ki Daloi bad Ka JHADC, imat ka don ka jingshah pynsngewthuh bakla ia ka ain, kaba ki ioh ia ka hukum na ka ing bishar ba ha khliehduh jong ka Ri, kaba ai lad ia ki Daloi ban ia sngewthuh jingmut shwa bad ka District Council lada ki don jingthmu ban pyntreikam ia ka Customary practice kaba ju leh da ki katto katne ki Elaka, Hima Lane Sirdarship bad ym baroh ki Elaka kiba leh ia kane.
Na ka liang ka JYF ka kyntu ia ka JHADC hapoh ka Jingialam u Ma Thombor Shiwat kum u CEM, bad ki Khlieh nongsynshar Elaka (ki Daloi) ba kin nym ia pynibor shuh nangne shakhmat. Ka ba bha tam eh hapdeng kine ki arliang mamla ka dei tang ka jingiamap bad ia sngewthuh jingmut noh da kaba wan pyndem ha ka jingiakren iasuk khnang ba ka synshar ka khadar kan long kaba iaid ryntih hapoh u pud sawdong jong ka JHADC.
