Shillong, Lber 05: Hadien ar sngi bala pyndep ia ka niam ka rukom ia ka met jong u Bah Lurshai Hynniewta bam kwai ha dwar u Blei uba la duh noh iala ka jong ka jingim ha ka jing shah hiar thma ba kyndit jong ki mynder ha ka shnong Ichamati, East Khasi Hills District hadien bala wai ka jingialang pynshah CAA bad dawa ILP da ki saw tylli ki seng kiba kynthup ia ka KSU, FKJGP, HNYF & RBYF ha ka 28th Rymphang 2020.
Na ka liang jong ki saw tylli ki seng ha ka 4th Lber 2020 ki la shong jingialang kyrkieh ban iatai sani bad ban ia pyrkhat kham jylliew halor katei ka bynta bad kumjuh ruh ban shim ia ka sienjam nangne shakhmat namar ba ha katei ka sngi kata ka 28th Rymphang 2020 kum ka jaitbynriew kala mad ia ka jing shah tynjuh bad kaba la pynpar niangkhriat ia ka jylla hi baroh kawei.
Namar ba ki mynder kila nud ban thombor im im peit peit ia ka kynhun jong ki seng bhalang hadien bala wai ka jingialang paidbah tad haduh ba kila nud ban dkhat jubor wat ia ka jingim briew bad ban bom ban tied da ki tiar pynmynsaw ia ki bun ki dkhot jong ki seng bhalang kynthup ruh ia u Sordar jong ka shnong Umwai.
Ka jingialang pyrkhat kam jong ki Saw Seng ha ka 4th Lber 2020 ka la pynrem jur ia katei ka jing jia namar ba ka kynhun jong ki sengbhalang mynta la saw bnai kynthih kila iaid ban pynlong iaki jingialang paidbah ha ki bynta bapher bapher jong ka jylla ban pynshai paidbah ia ka jing donkam iaka ILP bad kumjuh ruh ban pynshah jur ia ka CAA bad kam ju don satia kano kano ka jingklumar ha ki jingialang paidbah phewse ha kane ka kynti kaba mynta kata ha ka 28th Rymphang 2020 ki mynder kila nud ban pyni bor pynban iangi kum ki trai ri trai muluk hala ka jong ka khyndew ka shyiap.
Ka jingialang kala iathir sani bha ruh ban peit ngor ia ka jinglong jingman nangne shakhmat ia kiba pyrshang ban thombor ia ki trai ri trai muluk bad ka kynhun jong ki saw tylli ki seng bhalang kala pynpaw ban kam don satia kano kano ka jingeh iada na ki mynder ha ki thain khappud bad ha kylleng ka Bri U Hynniewtrep ban kyndang naphang.
Da ka mynsiem kaba sngewkhia bad kum ka dak jong ka jingburom ia ki Syiem, ki Sordar bad ia baroh ki Nongialam Shnong bad nong synshar shnong ki saw tylli ki seng kila sngew dei ban khot shwa ia ki ban phylliew bad ban iamir jingmut kumno ban pyrkhing ia ka jingbuhai shnong jong ki briew kiba na bar, ban teh lakam ia ka jingrung laitlan jong ki mynder namar kumba ka long mynta ka jaitbynriew hi baroh kawei kala sakhi shaikdar ba u bsein hadien ba u la syaid u sdang ban puh kylla.
Ka jingialang da kawei ka jingmut bad da ka mynsiem kaba sngewkhia halor katei ka jingjia kala shim ia ka rai ban khot kyrkieh ia ka jingialang kaba kyrpang ia u Syiem bad ki Bakhraw jong ka Hima Sohra, Ki Sordar Shnong jong ka shnong, Mawlong, wahlong, Majai, Sohbar, Ki Rangbah Shnong, Ki Nong Synshar Shnong.
U Wahadadar, Ki Executive member jong ka Shella Confederacy bad kumjuh ruh ia ki Miners & Exporter Association jong katei ka thain haka 6 tarik, Lber 2020 haka por 12:00 nohphai sngi ha Mawmluh, Sohra Dorbar Hall khnang ba yn lah ban iatai sani halor kitei ki jinglong jing man bad kumjuh ruh ban shim ia ki sienjam nangne shakhmat.
Naka liang jong ka KSU, FKJGP, HNYF & RBYF ka kyntu ia u Syiem bad ki Bakhraw jong ka Hima Sohra, Ki Sordar Shnong jong ka shnong, Mawlong, wahlong, Majai, Sohbar, Ki Rangbah Shnong, Ki Nong Synshar Shnong, U Wahadadar, Ki Executive member jong ka Shella Confederacy bad kumjuh ruh ia ki Miners bad Exporter Association.
Na ka liang ki saw seng kila kyntu ba kin sngewbha ban shimkhia bad ban pyllait por khnang khnang sha katei ka jingialang na ka bynta ka khia ka shon bad ka jingkitkhlieh iala ka jong ka jaitbynriew namar wat la ka long makna ha ka por kaba lyngkot hynrei namar ba ka kam ka dawa kumta la kyrpad ia baroh ba kin sngewbha ban shim ia kane kum ka jing pyntip.
Bad Kum juh ruh ia ki jingialang paidbah kumba ju pynlong ha ki bynta bapher bapher jong ka Ri lum Khasi bad Jaintia yn nang iaid nangne sha khmat, kane ka long katkum ka kyrwoh kaba la phah da u Dundee Cliff Khongsit General secretary ka FKJGP.
