Shillong 25 Iaiong: Ki nonghikai skul Deficit mynta ka sngi,kynthup ka Khasi Jaintia Deficit School Teachers Association (KJDSTA) bad ka Garo Hills Deficit School Teachers and Employees Association (GHDSTEA) ki la rah shibun ki mat ban iakren bad u myntri ha kaba iadei ka jingeh jong ki nonghikai, kynthup ki kot pule ka MBoSE, ka Education Policy bad kiwei hynrei ka kylla sepei namar ba ka jingiakren kam poi shano shano ruh.
“Ka jingiakren bad u myntri kam long kaba seisoh eiei”, la ong President ka KJDSTA u Bah ED Nongsiang haba kren hadien ba la mih na kamram u myntri.
U Bah Nongsiang u la ong ba ha ka jingshisha, ki nonghikai ki la rah bun ki mat ban iakren bad u myntri hynrei tang ia kawei ka mat kaba iadei bad ka jingdawa ban siew tulop katkum ka 5th Pay Commission ia ki nonghikai deficit ruh, khlem lah ban poi shano shano ruh namar ba u myntri um lah ban kular eiei nalor ba um pat tip bha ia ka jingeh ki nonghikai.
“Kumba ka paw, u myntri um pat sngewthuh bad um pat tip bha ia ka jingtreikam ka tnad pule dangle”, la ong u Bah Nongsiang.
U Bah Nongsiang u la iathuh ba ka jingthmu jong ki nonghikai ban iakren bun ki mat ba iadei kumno ban pynkhlaiñ ia ka pule puthi kum ka education policy, ki kot pule, bad kiwei kam shym la poi shuh namar ba tang ia kane kawei ka mat ruh u myntri um shym la sngewthuh bha bad katkum ba paw, u myntri um pat sngewthuh ia ka jinglong jingman jong ka tnad pule puthi.
Namar ba u myntri um lah ban pynthikna eiei, na ka liang jong ki nonghikai ki la rai ban shong jingialang ban iapyrkhat kumno ban leh halor kane.
“Ngin iashong jingialang mynta sngi ban iakren kumno ban leh halor kane ka jingbym seisoh ka jingiakren bad u myntri”, la ong u Bah Nongsiang.
Namar ka jingbym hun ia ka jingiakynduh bad u myntri, ki nonghikai ki la rai ban leit iakynduh noh ia u Myntri Rangbah u Conrad K Sangma shen ha kine ki sngi.
U la ong ba lada ka sorkar kam sngap ia ki jingdawa jong ki, kim banse wat ban mih sha madan ruh.“Lada ka sorkar kam sngap ia ki jingdawa, ka jingiakhih barabor ka don beit ha ka jingpyrkhat”, la ong u President ka KJDSTA.
