Guwahati, Naitung 05: Ban pynkloi ia ki lad ai jingsumar bad kumjuh ruh na ka bynta ban pynpoi ia ki lad ai jingsumar sha kylleng ki jaka ka thain Northeast ki bym don ki surok ki lynti ki syngkien kiba biang, ka GNRC kaba la tip ruh kum ka Guwahati Neurological Research Centre, mynta ka sngi ka la plie ribon ia ka jingthmu kit nongpang sa da ki helicopter ba lah ai kyrteng ka ambulance medical outreach programme.
Ka jingthmu ba kongsan ia kane ka service kalong ban pynkhlain shuh shuh ia ki lad ai jingiarap jingiada bad sumar paidbah kaba paka. Kane ka prokram kan don ruh ka rukom ai jingsumar kaba ki doktor ki staff nurse kin poi haduh ha iing u nongpang kiba don ha kylleng ki shnong bad ki jaka ka thain Northeast ba kynthup naduh ka jylla Arunachal Pradesh, Assam, Meghalaya, Manipur, Mizoram, Nagaland, Tripura bad ka jylla Sikkim ruh kumjuh.
Ia kane ka prokram la pynbna mynta ka sngi ha nongbah Guwahati kaba dei ruh ka sngi ba la pyndep ia ka jingshna ia ka GNRC North Guwahati campus ba la tip kum ka GNRC Medical.
Lehse kane ka prokram kan dei ka sien kaba nyngkong eh ban pynbna ia kane ka rukom ai jingsumar ha ka thain North East baroh kawei. Ka mission jongka GNRC Medical kalong ban ialad lane ba ki paidbah kin ioh jingsumar kaba bha ba klio bad ha kador kaba bit ruh kumjuh. Kane ka hospital ba heh kaba don ha nongbah Guwahati kaba don ruh 300 jingthiah ka peit kyrpang bha ruhu ia ki jingpang naduh ka MRI, Cath Lab bad ka CT Scan. “Tang ha kine ki 6 bnai ba la lah kane ka Hospital ka lah ioh ban pdiang haduh 200 ngt ki nongpang manla ka sngi, ong u Dr. Nomal Chandra Borah, uba bat kyrdan kum u CMD ka GNRC Hospitals Ltd. “. Kane ka jingwan bun ngut ki nongpang ha ka shisngi shi sngi kadei namar ki paidbah ki sngewthuh bad ki sngewhun ia ki rukom ai jingsumar ha ka Hospital.
Dang shen ka GNRC Medical ka lah shah jied bad ithuh ruh da ka World Bank Group (WBG), bad ka lah ioh pdiang haduh US$150,000 lyngba ka jingshim khia ka India Development Marketplace . Na ka liang u Dr. Borah u lah ong ba, “ngi dang thmu shuh shuh ban shna biang sa kumba 10 tylli ki Hospital ha kylleng ki jaka jongka thain Northeast ha kine ki 5 snem ban wan.
Lah ban kdew ruh ba ka GNRC ba la tip kum ka Guwahati Neurological Research Centre , la sdang nyngkong da u Dr. Nomal Chandra Borah ha u snem 1985. Kadei ruh ka super specialty healthcare centre ba nyngkong tam ka thain North-East India. Kumba long mynta ka GNRC ka treikam haduh 3 tylli ki jaka ha ryngkat 500 tylli ki jingthiah baroh. Nalor ki trai jylla kiba wan sumar ha katei ka hospital ka GNRC ka ju ioh pdiang bad sumar ruh na kylleng ki nongpanga na ki jylla ba marjan bad wat ki briew kiba na bar ri kynthup ka ri Nepal, Bhutan, Bangladesh bad na ri Myanmar. Lah ithuh ruh ia ka GNRC da ka British Standard Institute, London bad ka lah dep ban ithuh da ka organization kum ka ISO 14001:2008 compliant.(SP News)
