SHILLONG,Nailar 07: U Bah Michel Syiem u Convener ka Maitshaphrang ula rai ban pynlong da ka jingshah thngan ba khlem buh por kum ka dak jong ka jingpyrshah halor ka jingpynslem ka sorkar ban shna ia ka kyndon aiñ,ka Meghalaya Compulsary Register of Marriage Act 2012 kum shibynta ban iada ia ka kam shong kha shong man na ka jingjot jingpra ka iing ka sem ha kane ka jylla bad kane ka jingai por kan long arbnai ia ka sorkar ba kan pyntrei kam noh ia kane ka aiñ.
U Bah Michel Syiem haba ia kren bad ki lad pathai khubor mynta ka sngi ula ong,ba naduh u snem 2012 ha ka Assembly session la pynlong aiñ ia Marriage Act hynrei haduh kat mynta ki sngi ka sorkar kam shym la shna ia ki kyndon aiñ ba lah ban teh la kam ia ka kam shong kha shong man namar kumba ka long mynta ka jingshongkha shongman ha man la ki long iing ki long kiba synjor bha bad ki pait ki pra na ka daw ba kam don ka aiñ kaba pyrkhing kaba lah ban teh la kam ia ka kam shongkha shongman ha kaba u shyrang ynda ula phet na ka lok ym ju don shuh ia ka jingkit khlieh na ka bynta ki khun ki kti.
Shuh shuh u Bah Michel Syiem ula ong ba ha ka jaitbynriew khasi u shyrang ym ju ioh bynta na la ka jong ka iing kur ba ym ioh hok ha kano kano ka bynta kumta kaba pynlong ia u shynrang khasi ban kham sting ha ka jingkit khlieh ia ka iing ka sem ka sem ne ia ki khun ki kti kaba pynlong pat ia kiba bun na ki iing ki sem ki jot ki pra bad synjor na ka daw ba kam don ka aiñ ba khlaiñ ban teh la kam ia ka shong kha shong man ha kane ka jylla.Kumta jingpynlong aiñ ia ka kam shongkha shong man (Marriage Act) kan teh la kam ia u shynrang wat lada ula ia phet bad ka lok hynrei u hap ban don ka jingkit khlieh na ka bynta ka jingdonkam ki khun ki kti bad ka jingioh bhah jong u shyrang khasi na la iing kur kan kham pynkhlaiñ shuh shuh ha kaba iarap ban kamai kajih ban ai ka jingkyrshan ba pura na ka bynta ka iing ka sem
Ha kane ka jylla ka sorkar ka kheiñ sting palat ia ka kam shongkha shong man kaba long kaba donkam na ka bynta ban shna ia ki kyndon aiñ khang ban lah ban teh la kam ia ka jingsynjor jong ki iing ki sem bad kaba ktah bha ia ka jingim jong ki briew hynrei phewse ka sorkar ka dang kham pynleit jingmut na ka bynta ki nongdie jingdie kiba dei ki bar jylla kiba wan kamai ha kane ka jylla bad ha ki snem ba la leit noh nga la wan ban ia kynduh ia u Chief Secretary barim u Bah W S Pariat ban pynlong aiñ ia kam shong kha shong man hynrei haduh kat mynta ki sngi ka khlem poi shano shano ruh,la ong u Bah Michel.SP News)
