Shillong, Naitung 05: U Bah Sanbor Shullai-MLA lem bad ki dkhot jong ka Shillong Cantonment Area Development Committee, kila ia kynduh ia ka myntri korbar ri jong ka sorkar pdeng ka Nirmala Sitharaman ha ophis trei kam jong ka ha Parliament ha nongbah Delhi bad ha kane ka jingiakynduh kila ai ia ka dorkhas ha kaba ia dei bad ka jingeh ki paidbah ba ki ia kynduh hapoh jong ka kontonment ha Shillong.
U Bah Sanbor Shullai MLA jong ka 19th Shillong South lem bad ki dkhot jong ka committee kila ia kren bniah halor ki mat kaba kila ai ha ka dorkhas sha ba myntri korba ri jong ka sorkar pdeng.
Ka matba ka nyngkong eh ha ka dorkhas ka long ba ka tnad shipai ka dei ban pynphai noh ia ka Garrison Ground ne ka madan Kyrkit sha ka Sport department jong ka sorkar jylla na ka bynta ban pyndon kam ha ka National Games ha u snem 2022 ha kane ka jylla Meghalaya.
Ha kane ka jingiakynduh la kyntu ia ka sorkar pdeng ba ka dei ban mang pisa na ka kantonment na ka bynta ka koit ka khiah ki paidbah, ia ka jaka ai jingsumar kaba don ha Shillong dei ban kyntiew noh sha ka ka Hospital, kum juh ia ka UP School sha ka Higher Secondary ha ka kyrdan jong ka CBSE.
Ha kane ka jingiakynduh la kyntu ruh ia ka myntri ka sorkar pdeng ba kan pynkylla noh ia ain shna iing ban shna iing na ka ar mala sha ka saw mala, ia ki jaka ba dang lait dei ban ai sha ki paidbah ban shna ia ki iing dorbar, jaka leit sha bar, ki jaka ialehkai ki khynnah bad ki jaka ieng kali na ka bynta ka jingmyntoi jong ki paidbah.
Halor kane ka jingiakren katkum ka dorkhas na ka liang jong ka myntri korbar Ri kala shah skhor bad kala ai ka jingkular ba kan sap hah peit bniah bad ha dien kata kan sa khot biang ban ia kren halor kine ki mat kiba la buh da u Bah Sanbor kum u MLA bad ki dkhot ka Committee.
