Shillong, Iaiong 04: Ka sorkar jylla kala ai jingmut ia baroh ki paidbah nongshong shnong ba ki dei ban deng ia ki mask haba ki don ha kano kano ka jaka paidbah bad ki dei ban sait tuh ia ki kti jong ki bun sien, haba jyrhoh ban kah da ka jain rumal iaka shyntur bad ban ia jngai iwei na iwei kumba la dep ban bthah.
Ha dien ba ka sorkar kala dep ban thaw ia ka “Medical Expert Committee” ha kaba ia dei ban peit kyrpang ha kaba ia dei bad kane ka jingialeh pyrshah ia u khniang jingpang COVID-19, kala don ka jingiakynduh ryngkat bad u Chief Secretary jong ka jylla ban ia kren halor kane ka bynta ba dei ban pyndon kam ia ki jingdeng mask ban ialeh pyrshah ia ka COVID-19.
Ha kane ka jingiakynduh katei ka kynhun kila ia kren bniah halor ka jingbthah jong ka WHO, ha kane ka jingiakren la ia poi ha kawei ka rai ba nalor ba deng ia ka mask don kam ban leh khuid ruh ia ki kti da kaba pyndon kam ia ki jingkynlan kti, ban sait da ka sabon bad ban ia jngai iwei na iwei bad ia ki mask ym dei ban ktah ia ka bynta ba sha khmat ioh don ka jingbit jaboh.
Na ka liang jong ka kommittee kala ai jingmut ruh ia ki paidbah ba ki lah ban suh hi hala iing ia ki mask tang ba ka dei ban long da ka jain bala shna na u kynphat bad kane ka mask ka dei ban don arsyrtap. Ka mask kaba kin suh ka dei ban tap ia u khmut, ka ktien bad ka bynta jong ka tmoh.
Kumno ban suh ia ka mask lah ban peit nuksa na ka website jong ka tnad ka koit ka khiah jong ka sorkar pdeng www.psa.gov.in bad na ka website ka tnad ka koit ka khiah jong ka ka sorkar jylla.
Ban pynthikna ba ki mask ki dei ban biang na ka bynta jong ki paidbah la aiti sha ka tnad karkhana jong ka sorkar jylla ba kin shuh lai lak tylli ki mask bad ba kin pyndep hapoh ka 10 tarik mynta u bnai bad kane ka jingsuk mask kan dang bteng, ka sorkar kala phah thied ruh 10 lak tylli ki mask na sha bar ka jylla khnnang ba ka mask ka dei ban don na ka bynta ka jingdon kam ki paidbah.
