Ba pynduh noh ka sorkar pdeng ia ka NESSP ia kynduh ki dkhot ka seng TPFNEI ia u Conrad

Shillong, Naiwieng 17: Ka kynhun jong ki nongshna Durim TV ia kaba la tip kum ka “Television Producers Forum of North East India”  ka la ia kynduh ia u myntri rangbah ka jylla u Conrad K Sangma ha ka sngi Thohdieng ban pyntip shaphang ka apot jong ki tyngshop puron, ki kaitor ki myllung na ka thaiñ ki ba lah duh noh la ki kam donsap ha ka ba la sangeh noh ia ka Commissioned Programme ha u snem 2012 da ka Prasar Bharati Broadcasting Corporation of India, ba la phah lyngba ka Doordarshan Kendra.

Ka kynhun ba la lam khmat da u Deepak Kumar Datta ka la aiti ia ka Dorkhas ban phah sha u Myntri Rangbahduh ka Ri India, U Narendra Modi lyngba u myntri rangbah ka jylla. Ka dorkhas ka la pynpaw halor ka jingthmu jong ka kam pynroi na ka bynta ki riewdonsap jong ka thaiñ Shatei Lammihngi ka Ri India ka ba la sdang naduh u snem 1996 ba la tip kum ka  ‘North East Special Software Package’, ka ba dei na ka bynta baroh ki jylla ha ka thaiñ.

Ka dorkhas ka la ban jur halor ki jingmyntoi jong ki tyngshop ki puron, ki kaitor ki duhalia, ki myllung bad ki nongthoh nalor kito ki ba trei ki kam korringdur bad kiwei kiwei ki bynta jong ka shna durim. La pynshai ruh ba ki sap tynrai na ka thaiñ ki lah ban pynmih la ki snap paka tang lada don ka jingkyrshan ba tyngeh na ka sorkar.

La antad kumba shiphew hajar ngut ki riewdonsap ki la shu duh ei la ki kam tang namar ba lah sangeh noh ia ka Commissioned Programme, bad bun na kita ki lah sakma ban wad lad ha kylleng ka Ri India, katba kito ki ba ym don lad ki la shu sepei la ka sap namar ba ym don shuh ka lynti ka ba plie lad ba kin kyntiew la ki sap.

Ha kane ka liang ka dorkhas ka la kyrpad jur ia u Myntri Rangbahduh ban jurip bad bishar bniah ia kane ka phang da ka ba pynim bioang ia ka kam pynroi lyngba ka ba pynmih durim TV ha Doordarshan Kendra ha baroh kawei ka thaiñ Shatei Lammihngi ka Ri India.

Lada pynim biang ia kane ka kam pynroi ki kam durim ki samla na ka thaiñ kin sa lah ban pynpaw bad pathai khubor paidbah ia ki kam ba ki sorkar jylla ki trei na ka por sha ka por ha ka ba kyntiew ha baroh ki liang jong ka rep ka riang, ka koit ka khiah, ka pule dangle bad kumta ter ter.

Ha ki snem ba la pyntreikam naduh 1996 haduh 2012 kumba ar hajar klur tyngka la bei lyngba ka Doordarshan Kendra jong baroh ki jylla na ka bynta ka kam pynmih durim bad bun jait ki durim la pynmih ki ba la pynpaw shynna ia ka jinglong jingman ba shisha jong ka thaiñ.

U Myntri Rangbah ka jylla, u Conrad K Sangma u la kular ban shim khia ia ka kam da ka ba syllok lang bad kiwei ki myntri rangbah na ka thaiñ bad ban leit lang shirup hakhmat u Myntri Rangbahduh Ka Ri India, U Narendra Modi ban dawa tyngeh ba u dei ban pynim biang ia kane ka kam pynroi durim khnang ba ki samla ba donsap na ka thaiñ kin lah ban nang kiew ha la ka kam.

Na ki khyndai ngut ki kher ki mer na ka thaiñ Shatei Lammihngi, ki ba la mihkhmat ia ka jylla Meghalaya ki long u Bah Raphael Warjri, Dr Kamal Jhunjhunwala bad Bah Keith A Pariat.

What Next?

Recent Articles

Leave a Reply

Submit Comment

*