Shillong, Iaiong 08: U Bah Prestone Tynsong, Myntri Symbut rangbah ka jylla mynta ka sngi u la ong “ Balei wan tuklar u bah Vincent H Pala bad u MLA ka Mawsynram u bah Himalaya Shangpliang ia ka kam iing ka NPP, ha ka por ba nga dang don ha ka Congress mynshuwa balei ki sngap”
Haba kren ha ki ladpathai khubor mynta ka sngi ha ophis trei kam jong u, u Bah Prestone u la kren ia kane halor ka jingmih khubor ba u Bah Pala bad u Bah Himalaya kila kren ha ka jingialang paidbah ha Pynursla ba de ka UDP kaba khanglad ia u Bah Prestone ban long Myntri rangbah.
Haba ia dei bad kane ka jingkynnoh jong kitei ki nongialam ka seng Congress khamtam u kyrtong MP u Bah Pala, u Bah Prestone u la ong ba ha ka por ba u dang don ha ka Congress dei ma u ba ia leh pyrshah ban weng ia u Dr Mukul Sangma kum u nongialam hynrei kine ki sngap jar jar bad mynta ynda u la don ha ka NPP ki wan ban tuklar.
U Bah Prestone u la ong ba ha ka por ba thaw ia ka MDA da kawei ka jingmut baroh la iarai lang ban kyntu ia u Myntri rangbah u Conrad K Sangma ba un ialam ia kane ka kynhun MDA, u la kyntiat ba kam shym don kumta kata ka jingiakren, la pynshai u bah Prestone myntri symbur rangbah ka jylla.
