Shillong, Lber 02: Ka Parliamentary Party (PP) jong ka United Democratic Party (UDP) hapoh jong ka KHADC mynta ka sngi kila ia mir jingmut halor ka jingkren jong u CEM ba ialam ia ka People Democratic Forum (PDF) ia kaba la mih mynta ka sngi hapoh ki lad pathai khubor ban ong ba ka party UDP kan bethah ia ki MDC jong ka ban wengnoh na ka PDF.
U Bah Teinwell Dkhar haba kren ha u SP News Agency u ba dei u nongialam jong ka UDP hapoh KHADC u la ong “ Nga kum u nongialam nga sngewrem ban iohi ia kum kine ki jingthoh bad lada dei ha nga shimet nga la weng mynta hi mynta ka sngi, hynrei namar ka dei ka kam party hap ban ia sngap ia ka sur u ba bun balang”.
Ka jingkhot kyrkieh ia ka jingialang jong ka Parliamentary Party jong ka UDP mynta ka sngi kaba dei jong ki MDC ka long halor ka jingmih khubor mynta ka sngi, haba la ia kren hapoh ka PP la shim ia ka rai ba kin pyntip ia kane sha ki nongialam jong ka party bad ai ki bor ba ha khlieh jong ka party kin shim ia ka rai.
Na ka liang jong ki MDC jong ka seng UDP hapoh jong ka KHADC mynta kin ap ia ka rai jong ka party lada ka party ka ong weng noh ki hap ban kohnguh ia ka rai jong ka party bad lada ka party ka ong ban ai ka jingkyrshan ia kane ka EC kaba la ialam da u bah PN Syiem kum u CEM ruh kin kohnguh ia ka party, ban dang kyrshan ne wengnoh na ka PDF ka rai ka shong ha ka party la ong u Bah Tweinwell Dkhar.
