Shillong, Lber 21: Da ka jingthmu ban kyntiew ia ki kam shangkai pyrthei ha East Jaintia Hills district, ka ‘Society for Promotion of Tourism’ kan pynlong ia ka ‘Discover East Jaintia Tourism Festival’ 2017, kaba ar sngi ka ban sdang ha ka 24 bad kan kut ha ka 25 tarik mynta u bnai ha madan West Youth Welfare ha khliehriat.
Haba kren ha ki nongthoh khubor ha Shillong Press club u Bah Glorious Bareh, u ba pynbeit ia kane ka tamasa, u la ong ba ka jingthmu jong ki ban pynlong ia kane ka tamasa kaba ar sngi ka long ban pyni sha ka pyrthei ba kane ka thain ka don bun ki jaka jngoh kai kiba itynnad ia kiba ym pat don ba tip.
U la ong ba katei ka thain ka don shibun ki kshiad, ki krem pubon kaba ki briew na kiwei kiwei ki jaka kim pat tip bad u don ka jingkyrmen ba lyngba kane ka tamasa ki briew kin sa tip ia kane ka thian.
Ha kane ka jingleh kmen kaba ar sngi kan don ruh ia ka iakop thei bhabriew ia kaba la ai kyrteng ka ‘Miss Lidakha’2017 bad ha ka 25 tarik pat kin don shibun ki jingialeh kai ryngkat ka tem ka pud ban pynshongshit ia ki paidbah.
