Shillong, Jymmang 10: U Bah Prestone Tynsong Deputy Chief Minister jong ka jylla u ba dei u Chairman jong ka High Level Committee (HLC) mynta ka sngi u la khot ia ka jingialang ban ia kren halor ka Them Motor, ia kaba la don lang u myntri ka tnad ka rep ka riang u Bah Banteidor Lyngdoh, Myntri kam pynroi sor u Bah Hamletson Dohling, Bah Renikton L Tongkhar bad u Bah Paul Lyngdoh na ka liang jong ka KHADC.
Haba kren ha ki lad pathai khubor ha dien ba la kut ka jingialang na ka liang jong u Bah Prestone u la iathuh ba kane ka jingialang kaba la long mynta ka sngi kala shim ia ka rai ban bethah ia ka Shillong Municipal Board ba kan ai jingtip sha kito ki briew baroh kiba shah ha Them Motor ba kin ai ia ka jubab ryngkat ki kot ki sla bad kane ki dei ban jubab hapoh shibnai.
La bethah ia ka SMB ba ka dei ban leit tah ia kane ka jingai jingtip sha ki jingkhang jong baroh kito ki iing kiba shah ha katei ka jaka, na ka liang jong ka HLC kala leh ia kane ka kam ka long ba ailad biang ia kito ki briew ba kin pynshisha ia ka jingsah ka jong ki ha katei ka jaka.
La ong ba ha ka sien kaba nyngkong, ha ka por ba ki leit ban ai ia kane ka jingtip la shem ba bun ki iing ki khang tala bad kane kala pynlong ia ka HLC ba kan shim biang ia kane ka rai ban leh biang ia kane ka jingai jingtip sha ki briew kiba shah ha katei ka jaka bad ki dei ban jubab sha ka Muncipal hapoh ka shibnai.
Bah Prestone u la iathuh ba ka Hima Myliem kala ai sha ka SMB ia kane ka jaka ha u snem 1954 bad kane ka jingai jingtip ban tip kino kiba dei hok ba sah ha kane ka jaka bad mano ki byndei namar 128 ngut ki dei kiba trei bad ka SMB katba 56 ngut kiwei pat ki trei bad kiwei ki tnad sorkar.
