Jowai, Lber 20: Ka All Jaiñtia Youth Welfare Organisation-Central Body (AJYWO-CB) lyngba u kyrwoh ba la pyllait da u Vice President ka seng, u bah J.R Siangshai ka la pynrem jur ia ka jingshah pyniap dusmon u President ka Jaiñtia Youth Federation (JYF), u bah Poipynhun Majaw, ha ki runar thrang snam, kaba la jia ha East Jaiñtia Hills District mynhynnin ka miet.
“Ki briew kila la leh ia katei ka kam ki dei ki briew kiba buh ia ka jingim jong kiwei bad ruh ia ka imlang ka sahlang ha ka jingshongsyier bad jingma.
Halor kane ka AJYWO kyntu jur ia ki bor jong ka aiñ ban thwet jur ia ki briew kiba don kti ha katei ka kam bymman bad ban pynshitom ia ki katkum da kaba tyngeh kat kum ka aiñ.
Ka seng ka phah ruh ia ka khubor sngewlem sha kiba ha iing ha sem jong u bah P. Majaw ba la khlad noh halor kane ka jingjia ba sngewsih kthang.
