Shillong, Nailur 11: Da ka jingsngewkhia ka mynsiem ba kumno yn weng noh ia ka jingeh ba ki paidbah ka Ranikor Constituency ki mad khamtam eh ha kaba iadei bad kane ka juk mobile mynta namar ha kiba bun ki jaka kim ju ioh network jong ki Mobile Tower bad na ka liang u MLA ba thymmai u Bah Pius Marwein u la khot ia ki heh jong ka Company Reliance Jio bad pyrkhat kumno ban weng noh ia kane ka jingeh ki paidbah.
U Bah Pius Marwein tang hadien khyndiat sngi ba u u la shah jied kum u MLA ba thymmai jong ka Ranikor Constituency bad u ba bat ruh mynta kum u Chairman jong ka Meghalaya State Resource Mobilisation and Employment Generation bad Co-Chairman ka Meghalaya Khadi and Village Industries Board u la khot ia kine ki heh ka company Jio ha karma trei kam jong u ha Additional Secretariat, Shillong.
ki heh ka company kiba la wan ki kynthup ia u Construction Manager u Rupam Pal jong ka Company Reliance Jio ha ryngkat ka jingia synran lang u Saijul Haque Shillong Finance Manager ban ia phylliew jingmut ne ia kren ha kaba iadei ban wan rah Mobile Tower ba thymmai hapoh ka Ranikor na ka bynta ban weng noh ia ka jingbym biang ka Network bad kumjuh ruh ban weng ia ka jingeh ki paidbah.
Na ka liang u Rupam Pal u ba long u Construction Manager jong ka Company Reliance Jio u la kular ba ha kine ki khyndiat taiew ne bnai ban sa wan yn sdang ban tei noh ia ki Mobile Tower hapoh ka shnong Phodkroh, Puksora, Wanokchiring, Nongjri bad Phlangdiloin.
Hadien katto katne bnai yn pyrshang ban pynbit pynbiang noh ia ki jingdonkam ban ioh ia ki jaka na ki trai khyndew bad kiwei kiwei ki jingdonkam na ka bynta ban buh ia ki Tower ha ka shnong 25 Mile , Borsora, Nongnah, Keniong, Rangthong bad Phlangmawprah. Kan sa don ruh ka survey ha kiwei pat ki jaka lane shnong ban buh Mobile Tower katkum ka jingibit jong ka Company Reliance Jio.
Na ka liang jong u bah Pius Marwein, MLA ka Ranikor, u la kyntu bad kyrpad ia kine ki heh jong ka Company Reliance Jio ba ki dei ban shim khia ban pyrshang katba lah ban pynsted ia ka jingtei ia ki mobile tower bad u da kyrpad ruh ia ki paidbah bad nongshong shnong jong ka Ranikor ba kin long ki briew ki ba kylluid mynsien ha kaba ia dei bad ka jingdonkam ban pyniaid shaphrang ia kane ka kam na ka bynta ka jingiabit ia biang lang jong ka imlang ka sahlang hapoh ka Constituency.
Kane ka long katkum ka kyrwoh khubor ba la phah na u Bah R. Bahunlang Sanglein, General Secretary, UDP Youth Wing Ranikor Circle bad ka Ranikor Constituency Development Committee (RCDC).
