Jowai, Nohprah, 13: Ka AJYWO Central Body hapoh ka jingialam u Bah M H Dkhar President bad u Bah Reachingson siangshai Vice President jong ka, mynta ka sngi ki la leit buh ia ka jingujor (FIR) pyrshah ia u Krishna Sapkota halor ka jingpyndom bakla jong u ia ka bor bad iktiar jong u Waheh Shnong ka Latyrke, East Jaintia Hills da kaba die paidbah ia ka Residential Certificate jong ka shnong Latyrke sha ki hajar ngut ki barjylla na ka kynhun Nepali bad Bengali ha ka dor RS.700/- haduh Rs. 100/- kawei khnang ba yn ioh pynrung Aadhaar Card ia kitei ki barjylla bad nongwei kat kum ba la paw ha u Mawphor ha ka 11 tarik, u Nohprah, 2017. Ha ka FIR kaba ka seng ka la ujor mynta ka sngi ha Khliehriat PS, ka la ong ba nalor ka IPC Section, 420, 466 ba ki pulit ki la pynngat kyndon ia utei u Nepali, ioh lehse dang don shuh shuh ki kyndon aiñ kiba lah ban pynngat shuh shuh ia utei u riew thok kum ka section 199 IPC bad kiwei kiwei de ki kyndon aiñ ki ba ia hap bad katei ka kam runar jong u lane wat ia ka jinglong trai ri jong u ruh dei ban tohkit bha ioh u pa ruh ha ka Citizenship Act 1955, Rule 2015. Ha ka jingiakynduh bad u CI & Officer Incharge jong ka Khliehriat PS, u S. Sangma mynta ka sngi, ka seng, ka la kyntu jur ia ki bor jong ka aiñ ban leh da kaba tyngeh ia u Krishna Sapkota bad ruh ban thwet, kem bad pynshitiom ia baroh kito ki ba don kti ha kaban iadie ia thied ia katei ka sertiphiket jong katei ka shnong. Ym dei ban ai jem da lei lei ruh em ia katei ka kam beaiñ kaba ktah ia ka lawei jong ka Ri bad ka Jaidbynriew rit paid jong ngi. “Ka jingleh jong u Krishna Sapkota kam dei tang ka kam pynkheiñ hynrei kadei ruh ka jingialeh pyrshah, ka jingñiewbeiñ bad kheiñ poh ia ka Jaidbynriew bad ruh ka jingbymkheiñ burom ia ka rukom Synshar Tynrai jong ngi. Ka dei ka jingpyrshang jong u ban hiar thma jar jar ia ka Ri bad ka Jaintia bynriew bad ia kane ngin ym ailad da lei lei ruh em ba kan dang iai bteng nangne sha khmat.” ong u Bah M H Dkhar President ka AJYWO Central Body. Ka seng, mynta ka sngi ka mut ruh ban ia kynduh ia u SP, ka East Jaintia, ban kyntu ia u ban leh da kaba tyngeh ia kiba kum kitei ki runar hynrei ym shym la ioh ban ia kynduh ia u namar u don meeting sha Shillong kumta, ka AJYWO ka la ia kynduh ia u ASP jong ka District, u L Sangma, MPS bad ruh ai kopy ia ka FIR jong ka ha u bad kyntu ia u ruh ban shim khia bha halor katei ka kam beaiñ jong u tei u Nepali. Ka AJYWO ka la mut ruh ban ia kynduh ia u DC, ka East Jaintia, mynta hi ka sngi ban ia kren sani bha bad u ha ka jingiadei bad ka jingpynrung kyrteng Aadhaar Card ha ka District, hynrei namar ba u ruh u don meeting sha Shillong, ym shym la ioh ban ia kynduh bad u, kumta ka seng kan sa ia kynduh biang ia u ha kine ki sngi ban wan. Ka AJYWO kan sa leit mih ruh sha ka JHADC kaba dei ka bor kaba dei peit ia ka rukom synshar shnong ban ia kren sani bha halor ka rukom ai ia ki Residential Certificate da ki Waheh Shnong ha Jaintia, khnang ba katei ka sertiphiket kan ym buh ia ka Ri ha ka jingma hadien ha bun. “Ka AJYWO ka kyntu ruh ia ki Waheh Shnong ha Jaintia, khamtam ha East Jaintia ba jyllei ki barjylla bad mynder ba ki dei ban da husiar bha ka ai sertiphiket sha ki nongshongshnong jong ki, khnang ba kane kan ym poi sha ki kti jong kito ki bym dei hok ban ioh ia ka, ioh kan wanrah ia ka umsaw ha ka Ri bad ka Jaitbynriew rit paid jong ngi hadien ha bud” ong u Bah M H Dkhar. Kum ban shu pynkynmaw ha u snem 2013, dei da ka jingtrei borbah jong ka AJYWO ba la lah ban tem bad pynduh jaid noh iaka shnong Nepali kaba kyrteng Umthea ka ba don ha East Jaintia Hills.
