Shillong, Lber 15: Ka Khasi Students’ Union (KSU) lyngba kane ka kyrwoh ka pynbna ba ka seng mynta u snem kan kynjoh sha u mawmer uba 40 naduh ba la seng ia ka ha ka 20 tarik u Lber 1978.
Ban rakhe ia ka jingialeh ba khlem shongthait kaba 40 jong ka seng, ka KSU kan pynlong da ki prokram bapher bapher ka ban sdang naduh ka 20 tarik u Lber 2018 bad ka ban pynhap pyrda pat ha u 20 tarik u Lber 2019.
Ha ka 20 tarik Lber 2018, ka seng ka pyntip sha baroh ki paradoh parasnam ba ka seng kan pynlong da ka jingiaid paidbah naduh ka ophis treikam ka seng ha Jaiaw Chapel Road haduh ka Soso Tham Auditorium ha State Central Library.
Hapdeng kane ka jingiaiaid paidbah ka seng kan pynieng eh rngiew ruh ia ka lama ka Union ha khmat u mot sah nam ka seng ha Lachaumiere. Ha Soso Tham Auditorium pat ka seng kan pynlong ia ka jingialang kum ka dak ban burom ia ka jinglenlade ki dkhot ka seng naduh ba la seng ia ka ha u 1978 haduh kane ka khyllipmat kaba mynta.
Kumta ka seng ia iawer bad khot ia baroh ki nongialam bad dkhot ka seng naduh kiba kitkam ha u 1978 haduh kiba kitkam mynta ba kin wan ia shim bynta lang ha kane ka jingrakhe ka ban sdang ha ka por 12 baje mynsngi ha ophis treikam ka KSU.
Shuh shuh namar ba ki dkhot jong ka seng naduh ki por kiba mynshwa ki la bun palat kumta ka seng kam lah ban wad ne leit ia kynduh iwei pa iwei kumta ka seng ka shim kabu lyngba ki lad pathai khubor ban iawer lang ia baroh ban ia wan lang ha kane ka sngi ba kyrpang ka seng khlem da thew ne sngeweiei.
Khatduh khatwai ka seng lyngba ka Quadragennial Celebration Committee ka iawer ruh ia baroh ki paradoh parasnam kiba don ka jingkitkhlieh na ka bynta ka khia ka shon ka Jiadbynriew ba kin ia wan shim bynta lang ha kane ka lyngkhuh snem kaba 40 jong ka seng.
