Shillong, Nailar 09: Ka seng Association for Democracy and Employment (ADE) kala phah da ka jingthoh sha u Chief Executive Member (CEM) jong ka Garo Hills Autonomous District Council (GHADC) u Boston Mark ban kylli na u la ka dei shisha ne em ba la ai patta ia ki bym dei riewlum ha Iew Tura.
Ha kane ka jingthoh kaba la phah sha u CEM jong ka GHADC na ka liang jong u Dalseng Bira Ch Momin, u la ba u la phah ia kane ka jingthoh ha ka kyrteng jong ka seng ban kylli na ki bor ba ha khlieh duh jong ka GHADC halor kane ka jingleh kaba long pyrshah ia ka ain ban ai patta ia ki bym dei ki riew lum bad ha ka jingthoh la ong ba u CEM jong ka GHADC u dei ban jubab ia kane.
Na ka liang jong ka seng ADE kila kam ba kila ioh ia ka jingtip ba thikna ba kala don ka jingai patta ia ki 15 ngut ki briew ha Iew Tura ki bym dei ki riewlum, ha kane ka jingthoh ka seng kala jer kyrteng ruh ia ki bad kita ki long, u Swapan Rishi, u Arun Rishi , u Otish Rishi, u Govinda Rishi, u Lal Mohan Rishi, u Jumbura Rishi, u Nironjon Rishi, u Amarswer Rishi, u Siben Rishi, u Gogal Rishi, u Sudangshu Rishi, u Dilu Rishi, bad u Mongol Rishi baroh ki dei na ka juh ka jaid.
Na ka liang jong ka ADE kala ong ba ka jingai patta ka dei kaba juh leh bad ia kane kim don ei ei ban ong, hynrei kane ka jingai jaka ia ki bym dei ki riewlum ka long pyrshah ia ka ai jong ka jylla ka Meghalaya Transfer of Land Regulation Act, 1970 , namar katkum kane ka ain jong ka sorkar jylla ka long ba ia ka jaka dei ban long trai tang da ki trai jylla bad kane ka jingai patta ia ki bym dei ki trai jylla ka long pyrshah ia katei ka ain.
Na ka liang jong ka seng kala kdew ba ka kyndon kaba 3(1) jong ka ain kala kren shai kdar ba ha ka jylla Meghalaya ia ka jaka yn nym lah ban ai sha ki byn dei ki trai jylla, lait noh tang da ki bor ba dei peit. Na ka liang jong ka seng kala iohi ba la ai patta ia ki briew ki bym dei ki riewlum bad da ka jingdon ia ka patta kila lah ban leh ia kiba bun ki kam jong ki bad kane kan ktah ia ka pateng jong ki ban wan. Kane ka jingleh ka pynkhein ia ka kyndon 21(e) jong ka Meghalaya Transfer of Land Regulation Act, 1971.
Na ka liangjong ka ADE ka dawa na u CEM ba u dei ban pynduh noh ia ki patta kiba la ai sha ki bym dei riewlum ia kiba la dep ban ai bad dei ban pynshitom ia kito baroh kiba ia don kti ha kum kine ki kam beain, la ong u Dalseng Bira Ch Momin haka kyrwoh kaba la phah sha ki lad pathai khubor.
