Khliehriat, Kyllalyngkot, 29: Ka AJYWO lyngba ka khubor ba la pyllait da u Bah M H Dkhar President jong ka, ka dawa shuh shuh na ka NHAI lyngba ka GR Infra Project Ltd ka ba pyntrei ia u NH-6 ban pynbun shuh shuh ia ki speed-breaker bad ki dak jingiada (Road Safety Signals) ha baroh ki bynta kiba u NH-6 u dei sam lyngba ki ba buh ia ka jingma ia u paidbah nongleit nongwan kjat bad ki nongñiah kali na ka bynta ki jingiada na ki jingjia ba sngewsih.
“Hoid, u surok NH-6 mynta u la kham bit bha na ka bynta ka leit ka wan jong u paidbah lada ianujor bad u NH-44 ba mynshuwa naduh ba shimti ka NHAI ia u. Da kane ka jingsdang bha jong une u surok, kiba bun ki nongniah kali bad heh bad rit, ki sngewtynnad bha ban ñiah sted ia ki kali jong ki ha ka jingiabeh kam. Hynrei kane ka jingbha jong une u surok ym tang ba ka dei ka jingmyntoi ia u paidbah nongleit nongwan, hynrei ka buh ruh iaki nongleit nongwan ha ka jingma ha ki ba bun rukom ki ba donkam ban da peit sani bha bad wad ruh ia ki lad jingiada shwa ba kin jia ki jingjia ba sngewsih” ong u Bah M H Dkhar President jong ka AJYWO Central Body.
“U NH-6, u dei iaid lyngba ki lum bad ki them bad ruh lyngba shibun ki shnong briew ba heh bad rit, ki office, ki iingmane bad ki jaka paidbah ha kaba ha ki ba kum kine ki jaka don kam ia ki lad dak (Signals) jingiada khnang ban lait na ki jingjia ba sngewsih. Kumta, ngi dawa na ka NHAI, ka GR Infra Project Ltd ba kin buh shuh shuh ia ki speed-breaker na ka bynta u ka bit ka biaing jong u paidbah nongiaid kjat khamtam ki khynnah skul bad ki khynnah rit ha ki ba kum kitei ki jaka paidbah bad ruh ban buh ia ki kynja saiñ (Road Signals) shwa ban poi ki ba kum kitei ki speed breaker bad ki jaka ba don jingma na ka bynta ki nongniah kali ruh, khnang ba baroh ar naduh u nongiaid kjat bad nongniah kali kin ioh ia ka jingiada bad long phikir.” ong shuh shuh u Bah M H Dkhar.
U Bah Dkhar u la ong shuh suh, “Hoid, ka jingbuh ia ki speed breaker mynta ha ki katto katne ki bynta ba donkam jong utei u NH-6 ka la long ka jingkyrkhu shikatdei eh ia ki paidbah nongleit nongwan da ka kjat. Ia kane, ngi da sngewnguh ia ka NHAI, ka GR Infra Project Ltd bad ki artylli ki District Administration jong ka thaiñ kiba la shim khia iaka jingdawa jong u paidbah. Hynrei tang tang kine ki lad jingiada, kam pat biang na ka bynta ka jingma kaba ap ia u paidbah nongleit nongwan lyngba jong utei u surok. Ngi dawa na ka NHAI bad GR Infra ban buh shuh shuh shibun kiwei pat ki speed-breaker bad ki jingaidak (Road Signals) ban iaida na ki jingjia ba sngewsih”.
“Wat la u NH-6 u dei u National Highway hynrei namar ba ka sorkar kam pat lah ban pynbiang ia kiba bun ki lad jingiada ia u paidbah ba leit ba wan da ka kjat lyngba jong utei u surok kum ba la leh ha kiwei pat ki bynta jong ka Ri India, hynrei na ka bynta ka bit ka biang jong baroh lang, wat la ngi hap ban iaid lyngba khyndiat ki jingthut bad jingktah iaka por ha ka leit ka wan lyngba jong utei u surok da ka jingdon ki ba kum kitei ki speed-breaker, ngi hap ban iaishah pat de na ka bynta ban iada ki mynsiem ba korkor. Ban shah shitom bad slem khyndiat ha ka leit ka wan lyngba utei u surok ka kham kordor shikatdeieh na ka bynta ban iada ia ka jingim jong u para briew ban iaka jingpoi biang por hynrei duh pat ia ki mynsiem ba kordor”. Kumta ka jingdon ki nongwoh nia ia ka jingdon jong ki speed breaker ha u NH-6 kam long kaba lah ban pdiang”, bynrap biang u Bah Dkhar.
“Ka AJYWO, ka dawa ruh na ki bor District ban pynsted ha ka ban pyllait noh iaka bailuksan ba dei ban pynpoi sha baroh kito kiba dei hok ban ioh ia ka na ka daw jong ka jingshah ktah jong ki jaka, ki kynroh iing bad ki iing ki sem jong ki ha ka jingpynshna ia utei u surok NH-6, khnang ba yn ioh ban pyndep kloi u ne u surok na ka bynta ka bit kabiang jong u paidbah baroh”. La pynkut u Bah M H Dkhar.
