Shillong, Nohprah 14: Ka FKJGP Sengkmie hapoh ka jingialam jong u Samla Kitboklang Nongphlang, Education Secretary bad Bah Elton Cliff Warjri, President East Khasi Hills District ha ryngkat ka jing ia don ryngkat ki Nongialam jong Ka Synjuk Ki San Shnong Sumer 4No, Byrwa, Umramblei, Law Byrwa bad Umtham kaba la ialam da u Bah K.W. Shylla, President bad u Bah R. Diengdoh Secretary ha ka 13th December 2017 kila thmu ban iakynduh u Bah P.S. Thangkhiew, Chairman cum Managing Director, hynrei namar ki don noh ki jing jia kiba sngewsih ha ing ha sem jong i kumta kitei ki Nongialam kila iakynduh noh ia U Bah F.M.Dopth (IAS), Director Corporate Affairs MeECL,Bah Debojit Warjri, Secretary MeECL lem bad kiwei de ki Officers kiba la mihkhmat na ka liang jong ka Office ban pan jingshai halor ka jing bym shim Admission shuh ha ki skul bala pyniaid da ka MeECL na ka bynta ki Class Nursery naduh u snem 2018.
Ha katei ka jingiakynduh kaba kyrpang na ka liang jong u Samla Kitboklang Nongphlang, Education Secretary FKJGP Central Body ula pynpaw ia ka jing bynniaw da kaba ong ba kitei ki Skul khamtam eh ia ka Skul kaba don ha Sumer kadei kawei na ki skul kaba la ai shisha ia ka jing shakri kaba paka na ka bynta jong ki Nong Shong Shnong jong katei ka thain namar ki dang duna palat ki skul ha kitei ki jaka, Shuh shuh na ka liang jong u Samla Kitboklang Nongphlang u la ong ba ka jingdon jong katei ka Skul ha Sumer kala long shisha ka jing kyrkhu na ka bynta ki Long ing kiba duna ha ka ioh ka kot namar nalor ka jing hikai kaba paka bad ka jing siew ruh ka long ha ka dor kaba bit palat haba ianujor bad kiwei pat ki Skul kiba don ha ki bynta jong ka Them Ri-Bhoi, nalor kata u la ong ruh ba ka Result ruh kalong kaba paka bha ha kaba katei ka skul kala lah ban sei bad ban pynmih ia kiba bun ki riew shempang naduh ki phew snem kiba la leit noh tad haduh kane ka khyllip mat kaba mynta.
Utei u Samla Nongialam ula ban jur bad kyntu ia ki heh jong ka MeECL ba ki dei ban ai jingshai kaba tikna namar u la ong ba ki paidbah Nong shong Shnong bad khamrtam eh ki kmie ki kpa jong ki khynnah skul ki sah ha ka umdum halor ka jing bym shim Admission shuh ha ki skul bala pyniaid da ka MeECL na ka bynta ki Class Nursery naduh u snem 2018 lehse ka don kaei kaei kaba sha lyndet da ka jingthmu ban khang khyrdep noh shi syndon ia kitei ki Skul ha ka snem ki ban sa wan.
Na ka liang jong ki Heh jong ka Tnat MeECL kiba don ha katei ka sngi kila pynpaw ia kiba bun ki jingeh ban pyn iaid beit iaid ryntih ia ki skul namar ba ka tnat ka don hapdeng ka jing kyrduh pisa kaba jur, hynrei kila pynpaw pat ba haduh kine ki sngi na ka liang jong ka MeECL ka dang pyrshang ban wad ia ki lad ki lynti ha kajuh ka por kila pyn paw ba kam don satia ka jing thmu ban khang khyrdep noh ia kitei ki skul hynrei kila ong pat ba ka don ka jingthmu ban bteng bad ban pynbha ia kitei ki skul ban ai ia ka jing shakri tang naduh ka kyrdan Upper Primary Shaneng. Na ka liang jong U Bah F.M.Dopth (IAS), Director Corporate Affairs MeECL u la kular ban shimkhia ban pyn sngew ia kitei ki mat bala wanrah da ka Seng FKJGP bad Ka Synjuk Ki San Shnong sha ki Dkhot jong ka Board khnang ba kin ioh ban saindur thymmai ia kiei kiei baroh.
Kum ban shu pyn pynmaw ba Ka Synjuk Ki San Shnong hapoh ka jing ialam jong u Bah K.W. Shylla, President bad u Bah R. Diengdoh, Secretary dang shen kila lum lang ia ki Seng Bhalang kiba kynthup ia ka FKJGP, KSU & RBYF ban ia mir jingmut halor kitei ki jingeh ha kaba na ka liang jong kitei ki Seng Bhalang da kawei ka Sur kila rai ban ia shimkhia lang na ka bynta ka jingbit jingbiang jong ki paidbah kiba hap hapoh jong ka Ka Synjuk Ki San Shnong (Sumer 4No, Byrwa, Umramblei, Law Byrwa & Umtham) watla ki Nongialam jong ka KSU & RBYF watla kim shym la lah ban ia don ryngkat ha katei ka sngi namar ki don ki daw bym lah ban kiar satia hynrei kila ai pat ia ka jingkyrshan kaba pura ia katei ka issue. Na la liang jong ka Ka Synjuk Ki San Shnong mynne ka sngi ki la ai ruh da ka Dorkhas sha u Chairman cum Managing Director MeECL lyngba jong u Director Corporate Affairs MeECL ban kyrpad ban bteng ban shim biang ia ki Admission na ka bynta ki Class Nursery na ka bynta ka Skul kaba don ha Sumer ha kaba na ka liang jong kitei ki Heh jong ka MeECL kila ong ba kin sa shimkhia ia kane ka kam ban iakren ha ka Board Meeting bad ba kin sa ai jingtip Ha u Bnai Kyllalyngkot jong u snem thymmai.
