Shillong, Naitung 5:Ka Jaintia Students’ Union (JSU) War Jaintia Circle hadien bala bishar bad twad jingmut bha kala shim iaka rai ban dawa naka Sorkar Jylla ba ka dei ban kyntiew kyrdan noh ia ka tnad PWD Sub-Divisional Office kaba don ha Amlarem shaka kyrdan Divisional Office (EE office).
Kumba iatip lang, iaka Amlarem Civil Sub-Division la ioh bad la suit la shor iaka naduh ka 12th Nov 1976 bad ka peit ruh iaki jaka khappud bad ruh ia ka kad khaii bar ri ba heh tam ha Meghalaya (International Trade) bad ka Ri Bangladesh.
Kumta kala dei hok ban ioh iaki ophis sorkar kiba khamheh khnang ba kan don ka jingiajan hapdeng ki briew jongka Sorkar bad ki riew paidbah ka thain naka bynta ka jingiatrei lang ban kyntiew iaka ioh ka kot bad ka roi ka par.
Kumba long mynta, ka Divisional Office (EE ophis) ka don ha Jowai kaba ngi tip kum ka PWD South Division, bad kane ka Division ka peit iaki jaka kiba hap hapoh ka Amlarem Civil Sub-Division, bad kane kala pynjynjar ia u paidbah haka leit ka wan naduh ka por bad ka bai lut bai sep.
kumta ka Union kala sngewdei shisha ba ka sorkar kan Pyrkhat khia ban pynioh noh iaka E. E Ophis jong katei ka tnad da kaba kyntiew kyrdan iaka ophis kaba la don ha Amlarem naka PWD SDO ophis shaka kyrdan PWD E.E Ophis
Kum ban shu pynkynmaw, ka Amlarem Civil Sub-division kadei kaba shah iehbein namar daki phew snem mynta ka neh hi kumjuh, iaka Khliehriat Civil Sub -Division la kyntiew kyrdan Sha ka District, katba ka Amlarem ka neh hajuh.
Mynta ka Sorkar ka don jingthmu ban rah noh iaka ophis PWD North Division na Jowai sha Shangpung kaba dang hap tang hapoh ka Laskein Block ban pynjan iaki ophis Sorkar shaki paidbah, bad kumta ka Sorkar kam dei satia ban leh shiliang khmat, bad dei ban ai ruh iaka hok naka bynta ka Amlarem Civil Sub-Division.
Ka JSU ka kyntu bad kyrpad ruh ia ki paidbah jongka thain Amlarem Civil Sub-Division naduh ki para Sengbhalang bapher bapher, ki Waheh Shnong bad ki Riew paidbah ban iatrei lang kawei ka buit kawei ka bor naka bynta ka lawei ba phyrnai jongka Thain pynkut ka kyrwoh khubor na u Eddy Kery Pohtam President ka JSU War Jaintia Circle.
