Shillong, Jylliew 01: Ki lai tylli ki seng bhalang kiba kyntheup ia ka KSU, FKJGP bad ka HNYF ha ka jingialang kaba kyrkieh kaba kila khot mynta ka sngi kila shim ia ka rai ban dawa na ka sorkar ba hapoh ka 24 kynta ka dei ban kem ia kito ki briew kiba don kti ha kaba shoh briew ha Them motor.
Haba kren ha ki nongthoh khubor mynta ka sngi, ha ka jingiadon lang baroh lai seng u Bah Willbert Rani president jong ka seng FKJGP u la ong ba ki lai tylli ki seng ki dawa na ka sorkar ba dei ban kem ia ki briew kiba don kti ha ka jingshoh briew ha Them Motor ha ka sngi palei bad ka sorkar ka dei ban leh ia kane hapoh 24 kyntu.
Ha kane ka jingialang la rai ba ia ka jingialang kaba la khot da u Deputy Commissioner ha ka por lai baje mynta ka sngi ki seng bhalang kin nym leit ban ia shim bynta. Ka jingkylli ka lon ba balei ki pulit kim lah ban kem ia ki briew kiba don kti ha ka jingshoh briew.
U Bah Sadon Blah General Secretary jongka seng HNYF, u la ong ba ka sorkar ka dei ban siew bailutksan ia kiba mynsaw ha ka jingshah shoh bad baroh kiba la mynsaw ha kane ka jingpynjari jong ka sorkar ia ka Curfew, ka dei kaba ym juh jia koit ba ka sorkar kan pynjari ia ka Curfew. Mynta ka shong ha ka sorkar ban tem ia kane ka jingiakhih paidbah.
U Samla Lambokstarwell Marngar, u la ong ba ka jingdawa ban weng ia ka Them Motor ka dei kaba la slem bad ki lai seng bahlang ki dawa ba ka sorkar ba dei ban wengnoh ia katei ka jaka kaba la pynmih ia shibun ki jinghuri hura na duh ki por kiba mynshuwa bad ban weng ia ki ka shong ha ka jingstad jong ka sorkar kumno ban leh.
