Shillong, Kyllalyngkot 10: Ka Mawsynr
am Constituency Development Society (MCDS) ka la dawa na u khliehduh ka Khasi Hills Autonomous District Council (KHADC) Bah Pynshngain N Syiem, uba dei u CEM ba un hukum ia baroh ki MDC ba kin da thoh ia ka pisa (amount) ha ki maw (Plate) ha ki project ba la dep pyntrei khnang ba ki paidbah kin tip ia ka kam ba ki la pyntrei ha ki shnong ki thaw.
Haba iakren bad u bah Diralson Dkhar, President ka MCDS u la iathuh haba ki MDC ki la ioh mar T.3 klur ka skhim ba la mang da ka sorkar India kaba dei ka T. 133 klur jong u snem 2015-16 la iohi haba la dep pyntrei ia kano kano ka kam shym la thoh ia ka pisa (amount) ha ki maw ba la tah ha ka jingtrei kane ka la pynartatien ia ki paidbah namar ym tip katno ki ioh katno ki pynlut hynrei lada ki thoh bad ia ka dor ha u mawba ki la dep tah kan long shisha ban pynsngewtynnad ia ki paidbah.
“Ha kine ki sngi nga iohi ha ki ki kot khubor ba u bah Pynshngain N Syiem u ju kren ia ka jingkhuid jingsuba ha kaba iadei bad ka synshar ka khaddar hynrei mynta haba ki la pyntreikam ia ka skhim jong ka sorkar India kim lah ban wanrah ia ka jingkhein jingdiah kaba khuid namar u bah Pynshngain u khlem lah ban phah thoh ia ka dor ia ki skhim ha la ka jong ka Mawsynram constituency kat haduh ba la pynsah umdum ia ki paidbah” u la ong.
Shuh shuh u la dawa na u CEM bad ka Executive Committee ka KHADC ba u dei ban phah weng noh ia baroh ki maw ba la dep tah ha ki project ba la dep trei hynrei kin tah da ki maw ba la dep thoh ia ka pisa ba la dep mang khnang ban wanrah ia ka jingkhuid jingsuba bad ia kane la ai por tang hapoh 2 taiew.
U la ong kane ka skhim T.133 klur ka dei ba la phah da ka sorkar india kumta uno uno u MDC um lah ban pyndonkam bakla ia ka pisa kaba dei hok ban leit sha ki paidbah. “Lada u bah PN Syiem bad ka EC kim lah ban pyndep ia kane ka jingdawa hapoh ar taiew ngi lah ban ujor noh sha ki bor ba dei peit ia kane ka skhim ne sha ka sorkar India” u la ong biang.
Ha ka juh ka por u Bah Diral u la pyntip ba u la dep pan jingtip lyngba ka Right To Information (RTI) ia ka MDC skhim kaba la pyntrei na kane ka T.133 klur bad ynda la ioh ia ka jubab un sa pule bad sa leh ia kaba donkam. Ym tang ia ka MDC skhim kaba u bah Diral u la dep pan hynrei wat ia ka MLA skhim ruh u la dep pan na ka bynta ki MLA hapoh ka jylla ruh ban tip kumno ki sam skhim sha ki paidbah hashwa ba ki paidbah kin leit biang ban jied ia ki nongmihkhmat kaban long mynta hi u snem.
Katkum ka khubor ba la ioh lum jingtip na ki ophisar sorkar ba ia kane ka skhim jong ka sorkar India dei ban thoh ia ka dor pisa ha ki maw ba la dept ah hynrei kine ki ophisar ki la lyngngoh ban ioh jingtip ia kane ka khubor ba la shu thoh tang ia ka kyrteng jong ka jingtrei, ka snem namar kane kan sa buh jingeh kylla ia ki ophisar, ia ki nongpyntrei lada ka wan ka jingtohkit.
