Shillong, Nailar 30: Ha ka jingialang paidbah jong ka seng HYC ha pynursla mynta ka sngi ha kajingkren jong u Bah Robertjune Khar Jahrin, u la ong ba Ka wei na ki mat kiba ki shait ia kylli na ka por sha ka por ka long balei kum ka jaidbynriew dangdon kam ban iada ia la ka jong ka thymmei, ia la ka jong ka jinglong kyrpang bad ia la ka Hok longtrai jong ngi. ym lah ban len ba kum ka jaidbynriew la ioh shibun ki ain bad ki lad pynroi kiba la mang kyrpang, la don ia ka Jylla, ia ki ADCs, ngi don ia ka Land Transferred Act, ngi don ia ka Job Reservation Policy, Ngi don ia kita ki Reserve Seat ha ki Jingiakhun Election, don ia ka Trading By Non Tribal Laws, don ia ka ain Work Permit, don kita ki anti Infiltration Check Gate, ioh ki scheme bad ki Scholarship bad kumta ter ter.
Don ruh kiba ong ba ha ka jylla Meghalaya don 80 % ki Scheduled Tribe bad wat na ki General MLA Seat Khamtam na Khasi Hills lajop da ki Khasi .Shisien pyrkhat la sngewbiang bad la sngew ba la biang lut nadong shadong. Lada sngew ba tang katne ka la biang ka long kaei kaei kaba bakla, Ka Jylla jong ka dang dei tang ka Jylla ia khleh khaw lang bad u Garo bad ka jylla kaba dang shah tuklar ha ka India ha bun bah ki kam.
Ka Sorkar India ka lah ban shna ain halor ka Kyndew ka shyiap, Ki ADCs ki long tang ki tynshop kiba shu pyntieng ia ki poiwir hynrei kim da don kita ki bor kiba khlain khamtam eh haduh ba la pyntroin ia ka da kata ka Para 12- A(a) bad ki wei. Ka bhah kam kyrpang dang ha kine ki kyndiat sngi kala shah khein beain bad ka bym larkam da ka ing kashari Meghalaya High Court, Ka Meghalaya Land Transferred Act ka dang tlot bad kam biang pura khamtam eh ynda la pynkylla ia ka ban shah ia ki niam, ki jaka pule, ki kharkhana ban ioh jaka suk bad ruh ban shah ia ki Non Tribal ban ia ai pateng para ma ki ia ka kyndew.
Ki Khasi bajop na kine ka General seat kam mut ba kin jop beit shilynter bad wat lada ki jop ruh kumba lap bad iohi ki kham buh hakhmat ia ki bar ri bar jylla ban ia ngi kumta ki long hi thik kum ki barri . Ka jingneh jong kine ki ain kiba la don lypa mynta ka shnongeh ha ka jingneh jong ka Bor shynshar. Lada ia u lakam synshar la bat mangi kine ki ain kiba don mynta kin neh ki sah hynrei wei labat da kiwei ia u lakam synshar baroh kine ki ain ki sa shah kdiah.
Ki Poiwir kin pynkylla naphang ia kine ki ain namar kim iarap ia ki. Kin wengnoh ia ka Meghalaya Land Transfered Act, ia ka Job Reservation Policy, kin bun ki Poiwir bad ki bar ri ha ki ADCs, kin khylliap lama ia ki Riti jong ngi bad ki Bar ri ki bar jylla kin pyniaid ia ki Dorbar shnong ki Dorbar Hima jong ngi, kin pynduh ia ki Bor Synshar Trai ri jong ngi bad ha jaka jong ki kin wanrah ia ki bor synshar na bar ri, ngin sa duh ka ioh kam ioh jam ha ki ophis sorkar bad kum ka jaidbynriew yn sa duh sa dam bad sa long ka jaidbynriew ka ban duhbor noh bad kaban long mraw.
Kine kin jia long lada ngim kyndit bynriew bad lada ngim ieng iada noh mynta hi ia ka jingrung kyrthep bad ka jing ioh shongsah ki bar ri bar jylla kum ka jaid bynriew khasi ka dei tang u wei u symboh khaw ha shibyrni u khaw khar ka Ri India bad kine ki Khaw khar kin tyllup noh lada ngim iohi jngai bad lada ngim iada ialade. Haba kum kane ka por ba ka sorkar Jylla bad ki ADCs kim ieng ban iada ia ngi kadei ka kamram jong ki Bor Shyshar Trai ri bad jong u paid ka jaidbynriew hi baroh kawei ban ieng da jingkitkhlieh ban iada ia lade.
U General Secretary u la pynpaw ba dei tang ka ILP kaba lah ban teh lakam ia ka jingioh rung laitlan ki bar jylla ha ka Bri u Hyniewtrep . nalor ka ILP ngi dei ruh ban ioh ia ka Residential Permit for Immigrants kaban teh lakam ia ka jing ioh shong laitlan ki poiwir ha ka ri Jongngi. U la kyntu ia ki paidbah ba lada ki kwah ban ioh ia ka ILP bad ia kiwei ki ain kiban iada ia ka jaidbynriew ngi dei ban long la kloi ban ia mih sha khmat ban pynpaw ia kata.
U la ai jingmut ba lada u wei shi ing na baroh ka wei ka pynursla constituency ha ka juh ka sngi ha ryngkat ka seng kin ia leit sha ing u MLA bad dawa ia ki ain iada ri khamtam eh ia ka ILP tang ha ka session ban wan ngin ioh ia ka ILP hynrei lada ngin shu ia shnong kli kti ha ing sa da ki phew snem ruh ngim ioh ia ki jing dawa. U la kynthoh ruh ia u MLA ka pynursla ba um pat shem lah leh eiei ia ka jaidbynriew haduh mynta bad lada u dang bteng kumne ka seng kan ialeh pyrshah ia u. Ki Nongkren ki la ong ruh ba ka sorkar kam dei ban shim kabu ia ka jingiakhih ba jai jai jong ka HYC namar lada ka sorkar kan dang bteng ban leh kuman kumne ka HYC ka long la kloi ban pynbna ki jingiakhih kiba kham tyngeh.
Ka HYC, Riwar Mihngi Circle ha ka jingiatreilang bad ka HYC Seng Kmie mynta ka sngi ki la pynlong ia ka jingialang paidbah ha Pynursla. Ha kane ka jing ialang la ioh ban pynshai paidbah ia ki 14 tylli ki mat dawa jong ka seng khamtam eh ia ka ILP. Ia kane ka jingialang la pyniad da u Samla Glorious Swet President jong ka HYC Pynursla unit bad la ioh jingkren na U Edmund Khongngai President HYC Riwar Mihngi, U Francis G Mawlong Asst. Organising Secretary HYC-CEC, U Donbok Khar Lyngdoh Vice President bad U Robertjune Kharjahrin General Secretary.
Ki nongkren ki la ioh ban pynshai paidbah ia ki 14 tylli ki mat dawa jong ka seng , ki la pynrem jur ia ka jingleh sting bad leh bymsuidniew ka sorkar ia ki mat dawa jong ka seng nabynta ka Jaidbynriew bad ki la pynrem ruh ia u Prstone Tyngsong MLA ka Pynursla . U Edmund Khongngai, u la ong ba ka wei na ki mat dawa jong ka seng ka long ban pynbeit noh ia u pud u sam bad ka Bangladesh bad ka seng ka dawa na ka sorkar ba ka dei ban buh ia ka kynroh na u zero point ym na 150 yard na u zero point namar kane ka pynduh nong ia ka ki briew namar kin sa duh noh ka kyndew ka shyiap sha Bangladesh.
U la ong shuh shuh ba ka seng ka dawa ia ki ain kiban pynkhlain ia ka khaii ka pateng bad ka bylla ka sngi ia ki trai ri trai muluk. U Francis G Mawlong u la pynshai ia ki mat dawa jong ka seng bad u la kubur ba dei tang ka ILP kaba lah ban iada ia ka jinglong kyrpang jong ka Jaidbynriew jong ngi. u la kyntu ruh ia ki paidbah ban kyrshan ia ka Seng ha kane ka kynti namar khlem ka jing kyrshan ki paidbah ka jing ia khih jong ka seng kam don jingmut bad kum ka jaidbynriew ngin nymioh ban pynurlong ia ki ain kiban iada ia ngi kum ka jaidbynriew.
U Vice President jong ka seng u la pypaw ba kum ka jaidbynriew ngi la shah thombor bad shah leh bor ha baroh ki liang. Ngi la lim ha ka khaii ka pateng, ha ka bylla ka sngi, ha ka pule dangle, ha ka ioh kam ioh jam bad kumjuh ruh ha ka synshar khaddar. Ka daw baroh ka long ba ki Nongmihkhmat kim shem la ia said na bynta ka jaidbynriew bad ki la leh kam kai na ka por sha kapor.
Ki MLA ka Bri u Hynniewtrep ki la long thik kum kito ki player football kiba ynda mih madan kim nangshuh ban kynjat ia ka ball. U La ong ba ia ka jaidbynriew ladei ban ong noh da Khynriam, u pnar, ubhoi, u war, maram , lyngam dei u paid Hynniewtrep ba jynjar. U la ban ruh ba ki nongialam ka HYC ki long la kloi ban shah shitom nabynta ki mat bad ki dawbah ka jaidbynriew bad ngim sngewpher shuh ban rung ha ing byndi la da ka dei ia ngi ban rung.
