Shillong, Jymmang 27: U myntri rangbah ka jylla u Conrad K Sangma mynta ka sngi u la plie paidbah ia ka “Meghalaya Aroma Mission 2019” ha ka shnong Byrwa ha Ri Bhoi District bad ha kane ka sngi la plie ruh ia ka kot sain umphniang kaba nyngkong kaba dei na u “Lemon Grass”.
Ha ka jingkren jong u myntri rangbah ha kane ka sngi kum u kongsan, u la ong ba ka “Meghalaya Aroma Mission 2019” kan iarap ia ki nongrep ban kyntiew ia ka ioh ka kot jong ki namar ka umphniang kaba mih na une u phlang ki nongthied kila wan thied hi na jaka ba pynmih ia u.
Na ka liang jong u myntri rangbah u la ai ka jingiaroh kaba kyrpang ia u Bah Dest Marwein u ba dei u nongkhaii dewiong ha dien ba la khang dewiong u la phai noh sha kane ka kam thung phlang “Lemon Grass” bad ia kane ka sngi la lah ban pynlong kumba ka long mynta ka dei na ka jingprad lynti jong une u rangbah.
U Myntri rangbah u la ong ba ka kamrep ka dei kawei ka bynta kaba kongsan bha ha kaba kyntiew ia ka ioh ka kot jong ki paidbah namar kane ka bynta ka dei kawei kaba la ai kam bun tam eh ia ki paidbah bad ki nongrep ia ki don kam ban ioh ia ka jaka kaba kyrpang ha ka jingpeit jong ka sorkar.
U Myntri rangbah la ong ba tang na ka daw jong ka jingleh ka sorkar ha ki por kiba la leit noh, ia u synsar, sla tyrpad bad sohmrit khlaw la iew ia ki kum ki marrep bad kane kala buh ia ki nongrep ha ka jingeh haba die ia ki namar la hap ban don kam ia ka shallan ia kaba la tip kum ka “Transit Pass”, hynrei ka sorkar mynta kala weng noh ia katei ka jingeh ha kaba yn niew ia ki kum ki jingrep ha kaba ki nongrep ki lah ban die ia ki katba mon.
Haba phai sha kine ki jingthung ba long kynja dawai, u myntri rangbah u la ong ki briew kane ka jylla kila pyndon kam ia ki na kawei ka pateng sha kawei pat ka pateng bad mynta kala dei ka por ban ai pateng sha ka pyrtethei ia kane ka jingstad kaba ki briew ka jylla ki don. La ong ba ka sorkar lyngba ka CSIR-CIMAP ki de ban leh ia ka jingwad bniah bad buh bha ha ki jingthoh.
Kiwei kiba la kren ha kane ka sngi ki long u KN Kumar Additional Chief Secretary, ha ka jingkren jong u la ong ba ka sorkar kala mang pisa 18 klur na ka byunta kane ka “Mehalaya Aroma Mission”. La ong ba ha kine ki san snem ban wan yn thung 1000 hektar ia u ne u phlang “Lemon Grass”.
Ha kane ka sngi u myntri rangbah u la pynlait paidbah ruh ia ka jingthoh kaba ia dei bad kane ka “Meghalaya Aroma Mission” ha ka jingiadon lang, u Bah Jeson S Mawlong, Bah Meralborn Syiem, u Bah George B Lyngdoh MLA na ka Ri Bhoi District, u Director, CSIR- CIMAP, Abdul Samat, P Sampat Kumar, CEO, MBDA ,ka Deputy Commissioner, Ri Bhoi, R Kurbah. Ha kane ka sngi la sam ruh ia ki symbai Lemon Grass sha ki nongrep.
