Shillong, Iaiong 26: Ka ophis jong ka KHADC mynta ka sngi kala phah ia ki briew jong ka ban khang tala ia ka jaka trei kam jong ka kaba don ha Umsohiong namar ba ka M/S Unique Structure and Tower Limited kam don ia ki Labour License ia ki nongtrei. Kane ka long ha dien ba ka HYC Nongthliew kala ai ia ka jingujor.
Ha Kaba nyngkong, Ka HYC Sohïong Circle ka ai khublei ïa u bah Teibor Pathaw EM ba dei peit ïa ka Labour jong ka KHADC bad ïa ki pulit Inforcement jong ka KHADC ha kaba ïadei bad ka jing shimkhia ban khang tala mynta ka sngi ka 26tarik Ïaiong, 2019 ïa ka M/S Unique Structure and Tower Limited kaba don ha Umsohïong halor ka jing ai ujor jong ka Seng ha ka 24tarik ïaiong, 2019.
Kumban shu pynkynmaw ba kane ka jaka ka dei ka jaka ba la shu pyntrei ba-aiñ da ka tei ka kompeni ha kaba ka khlem ïoh jingbit na ka KHADC bad ki nongtrei bar jylla jong ka ruh ki shu trei be-aiñ ha kaba kim don ki kot ki sla kiba biang.
Ha kane ka sngi la ïa don lang ruh ki dkhot jong ka HYC Sohïong Circle ha ryngat bad ki dkhot jong ka HYC Nongthliew Circle. Ka long shisha ka jing ïoh jingkyrmen kaba khraw ïa ka jaitbynriew ban ïoh ki briew kiba trei hok ïa ka kam kumne.
Ka jingshim kabu bad ka jingïuh roit ki bar jylla ïa ka hok Longtrai jong ka jaitbynriew ka dei ka mat kaba kum ka jaitbynriew bad ka KHADC ka dei ban shim khia khnang ba ka pateng jong ka jaitbynriew jong ngi kan ym buh ha ka jingma, la bynrap u samla Purningstar Shabong.
Na ka liang jong ka Seng HYC Sohïong Circle ka ïai kyntu ïa ka KHADC ba kan shim khia ha ki bynta baroh kiba hap ha ka District Council khnang ba ki kompeni be-aiñ kin ym ïoh shuh ban shim kabu ha kane ka Ri jong ngi ha ka juh ka por, ka kyntu ruh ha ka KHADC kam dei ban ai Labour License ïa ki nongtrei bar jylla lada ïa ka kam la lah ban trei da ki Khasi.
Na ka liang jong ka Seng ruh ngin dang ïai bud dien ïa ka tei ka kam bad horkit hordang kan ym ailad ïa ki tei ki riew be-aiñ kiba shim kabu ha kane ka ri jong ngi.
