Shillong, Jylliew 24: U CEM jong ka KHADC u Bah Titosstarwell Chyne haba jubab ia ka jingkylli jong u bah Bajop Pyngrope MDC ka Rambrai u la ong, haba ia dei bad ka Kulsi Dam Project mynta ka dang don ha pdeng ka jingpeit bniah ka committee kaba la thaw da ka sorkar jylla na ka bynta kane.
Haba jubab ia ki jingkylli bynrap na ka liang jong u CEM u la ong ba ia mynta na ka liang jong ka KHADC kam pat lah ban shim ia ka rai ban pyrshah ne pdiang ia ka namar ka dang don ha ka committee jong ka sorkar jylla bad u wei na ki dkhot ha kane ka committee dei na KHADC.
U MDC jong ka Rambrai u la ong ba ki paidbah katei ka thain ki pyrshah namar kane ka jaka dei ka kaba don ha ka jingiakam mar kylliang ha pdeng ka jylla Assam bad Meghalaya kaba don ha pdeng ki lai tylli ki District, ka West Khasi Hills bad Ri Bhoi na Meghalaya bad Kamrup District ha ka jylla Assam.
U bah Bajop Pyngrope u la ong ba ha Meghalaya ia kane ka wah la tip kum ka Wah Khri, u la ong “ba kala don ka jingpyrshang ban ruh ka jingtrwa pisa ia u da ki briew ban kyrshan ia kane ka project kaba don ha katei ka thain ka jaka kaba ma nga u mih khmat ia kaba u tip ba ki paidbah ka thain ki pyrshah”.
U bah Titosstarwell CEM haba jubab ia ka jingkylli jong u bah Fantin J Lakadong la ong ba katkum ka ain shim khyndew jong u snem 2013 kaba dei jong ka sorkar pdeng baroh ki jingshim khyndew kiba hap hapoh jong ka jingpeit ka KHADC shuwa ban kin trei ki hap ban ioh ia ka NOC na ka District Council.
Haba jubab ia ka jingkylli jong u bah Cahrles Matngar haba ia dei bad ka registration ia ki jaka puta, u CEM jong ka KHADC u la ong ba ka KHADC kala sdang ban register ei ia ki briew kiba don jaka ha khappud bad ka jylla Assam bad kiba la wan mynta dei tang na ki thain Langpih.
Na ka liang jong u CEM, u la kren shai ba kaei kaba ka District Council ka leh kam dei ka Registration hynrei ka dei ka jingbuh ia ka bui jong ki jaka puta jong ki briew “Land record’ La kyntu ia ki briew kiba don jaka ha khappud bad ka Assam ba ki briew kin wan ban ai kyrteng ha kaba ka KHADC kan nym shim pisa.
