Shillong, Jylliew 21: Ka Dr. APJ Abdul Kalam Centre for Policy Research & Analysis hapoh jong ka IIM Shillong mynta ka sngi ka la pynlong ia ka e-symposium ha ka phang ‘Tourism (pportunities in NER’ hapoh ka e-Symposia Series on Emergent Nor
th East India: Strategic and Developmental Imperatives.
U Chairman ka Board of Governors, IIM Shillong, u Shishir Bajoria katba u dang pdiang burom ia kito kiba iashim bynta ha kane ka rynsan u la ong ba ka thain shatei lam mihngi ka long kaba itynnad bad kaba riewspah ha kaba iadei bad ki jingdon jingem ba la ai da ka Mariang.
“Dei ban pyni nam ia kane sha baroh kawei ka ri bad ka pyrthei ruh. Ngi don bun ki lad ban sdang ia ki kam jngoh kai pyrthei kiba iadei bad ka niam, ki tamasa, ka mariang bad ka archaelogy bad ngi thikna ba ki briew na kylleng ka pyrthei ki kwah ban iohi ia kane hynrei na ka bynta kane, ngi donkam ban pynbiang ia ki jingdonkam. Ka la dei por ba ngin peit biang ia kine ki jingdonkam kiba lah ban don ka jingktah kaba khraw ia ka ioh ka kot ha kane ka thain,” u la ong.
U la ban jur ruh halor ka jingkyntiew ia ki jingdon jingem ha ka thain bad ka jingiatrei lang bad ki jaka pule ban kyntiew ia ka kam jngoh kai pyrthei da kaba bynrap ba ka long kaba donkam ban kyntiew ia ki lad ban poi sha ki jaka bapher bapher bad ka jingiashim bynta jong ki kompani ba heh khnang ba ki kam jngoh kai pyrthei kin kiew stet ha ka thain.
Da kaba iaroh ia ka IIM Shillong kaba la lah ban pynlong ia kane ka e-Symposium hapdeng ki jingeh ba mih na ka khlam Covid-19, u kongsan, Prahlad Singh Patel uba dei u Myntri ka Tnat Culture bad Tourism, Sorkar Pdeng u la ong, “Ka jingkylla ha ka jingsngewthuh ka kham kongsan ban ia ka spah. Ngi don ka kabu ksiar ha khmat jong ngi ba ngin pynkylla ia ka jingeh sha ka jingbha da kaba pyni nam ia ka jingitynnad jong ka thain shatei lam mihngi bad khring ia ki briew bapher bapher kiba haduh mynta ki la jied ban leit kai sha kiwei kiwei ki ri ha ka jaka ban wan mad ia ka jingitynnad ha la ka ri”.
Lehse kane ka dei ka por kaba biang bha ban kyntiew ia ki kam jngoh kai pyrthei ha ka thain shatei lam mihngi. Ngi dei ban peit lut ia ki lad ki lynti katba ngi nang iai lait na kane ka khlam bad ngi dei ban pdiang ia ki nong jngoh kai pyrthei na kiwei kiwei ki ri ruh. Ngin lah ban leh ia kane tang lada ka Sorkar, kito kiba pynbeit ia ka jingleit jingwan jong ki nong jngoi kai, bad baroh kiba don bynta ha kane ka kam ki iatrei lang ban pynthikna ba ka jingwan kai sha kane ka thain kan sah jingkynmaw ha ki nongjngoh kai pyrthei.
Ha ka bynta kaba ar jong kane ka e-symposium kaba long halor ka phang ‘ki lad ki lynti ia ka thain shatei lam mihngi’ u Prof Keya Sengupta, Centre Coordinator u la ong ba dei ban pynkylla ia kane ka jingeh mynta sha ka kabu ksiar, “bad wad lad wad lynti lyngba ka jingiakren bad ki nongialam, ki nongseng kam, ki nongthied bad kiwei kiwei kiba iadon bynta khnang ban ioh ki kam jngoh kai pyrthei kiba thymmai, bad ban rah ia ki jingshem na kine ki jingiakren sha ka Tnat DoNER bad ka NEC, Shillong khnang ba kin wanrah ia ki ta treikam ba thymmai ki ban plie lad ia kakam jngoh kai pyrthei ba kan don ka bynta kaba kham khraw ha ka roi ka par jong ka thain shatei lam mihngi.
U dkhot jong ka Board of Governors, u Atul Kulkarni uba la pyniaid ia kane ka jingiakren u la kdew ia ka kam ba la ai ha ka IIM Shillong da ka Sorkar Pdeng, khamtam lyngba ka Tnat DoNER ban wanrah ka jingkyntiew, ban kyrshan lyngba ka jingwad bniah ia ki nongpyniad kam bad kiwei kiwei kiba don bynta ba kynthup ia ka jingiarap ia ki samla seng kam lajong ba kin ioh jingmyntoi na kane ka jingiadei bad ka IIM Shillong.
Ha ka jingkren pynkut ia kane ka e-symposium, u Symbud Myntri Rangbah ka Tripura, u Jishnu Debbarma u la kren shaphang ka khlam Covid bad ka jingdonkam ban pynim biang ia ka ioh ka kot. “Ki kam jngoi kai pyrthei mynta ki dei shi bynta jong ki jingdonkam ban ioh ia ka roi ka par ha kaba ki jylla ki lah ruh ban kyntiew ia ka jingiatrei lang bad ka jingiatylli ha kano kano ka thain.
Mynta ngi iohi ba ki kam jngoh kai pyrthei ki kyntiew ka jingioh nabar ri bad ka plie lad ruh ia ka jingioh kam bad ka jingiadei jong ki jait bynriew bapher bapher,” u la ong. U Debbarma u la kyntu ia ka IIM Shillong ba kan ialeh ban wanrah ia ki jingpyrkhat kiba thymmai da kaba kynmaw ia ka jinglong kyrpang jong ki jylla ha ka thain shatei lam mihngi khnang ba kan don ka jingsngewthuh kaba kham bha shaphang kane ha kiwei pat ki bynta jong ka ri.
Da kaba kdew ia ki jingktah jong ka khlam Covid 19 ia ki kam jngoh kai pyrthei, kiba iashim bynta ha kane ka e-symposium ki la iakren halor ka jingdonkam ban wanrah ka jingsngew shngain hapdeng kito kiba iadon bynta ha ki kam jngoh kai pyrthei bad ban pynkupbor ia ki khnang ba kin long kiba lah khreh ban bteng biang ia ki kam.
Ki la ong ruh ka long kaba donkam ban plie lad shuh shuh bad ban pynkhikna ka jingleh khuid khnang ba ka kam jngoh kai pyrthei kan lah ban poi biang sha ka kyrdan ba ka ju don. Ki la iakren ruh halor ki lad ban sngewthuh kumno ban lah ban khyllie biang ia ki jingbei tyngka ha ki kam jngoh kai pyrthei bad kiwei kiwei ki kam.
