Shillong, Nohprah 17: U myntri rangbah ka jylla u Conrad K Sangma ha ka sngi palei un plie paidbah ia ka skhim Ayushman Bharat – Pradhan Mantri Jan Arogya Yojana kaba la pynrung lang ia ka Megha Health Insurance Scheme ka bynta kaba IV, ha kaba u myntri ka koit ka khiah jong ka sorkar jylla u Bah AL Hek, Dr Indu Bhushan, the Chief Executive Officer – National Health Agency jong ka sorkar pdeng ruh kin don lang ha katei ka sngi.
Ka sorkar Meghalaya lyngba ka skhim State Nodal Agency of Megha Health Insurance Scheme (MHIS) kala ia leh bor bah pyntrei kam ia kane ka skhim na ka bynta ka jingmyntoi jong ki paidbah bad shuwa ban pyntrei kam ia kane kaba mynta la pynlong ia ki jinghikai na ka bynta kito ki briew kiba hap ban shimti ia ka kam ban suk ki paidbah.
Ha ka kyrwoh kaba la phah mynta ka sngi da u P Bakshi secretary ka tnad ka koit ka khiah jong ka sorkar jylla u ba dei ruh u CEO jong ka MHIS, u la ong ba kane ka skhim ha kane ka kynti kaba mynta ka jingiarap pisa kan long T.5,00,000 /- na ka ka bynta jong baroh ki briew jong ka jylla Meghalaya.
Kane ka skhim kan trei kam ha baroh ki hospital kiba la pyniasoh bad ka sorkar la ka long hapoh ka jylla Meghalaya lane sha bor jong ka jylla ruh kum juh. La kren shai ba kane ka skhim kan lait noh ia ki nongtrei jong ka sorkar jylla bad kum juh ia ki nongtrei jong ka sorkar pdeng.
