Shillong, Kyllalyngkot 21: Ha ka jingkren jong u myntri rangbah ka jylla ha ka jingkren jong kum u kongsan ha kane ka sngi u la ai khublei nyngkong ia ki paidbah ha kane ka sngi rakhe ia ka “Meghalaya Day”. U la ong ba ka jingrakhe ia kane ka sngi ka long ban kynmaw ia ki nongialam kiba mynshuwa kiba la ialeh ban pynioh ia kane ka jylla kaba mynta, ha kaba la ialeh ba jai jai.
Ha kane ka sngi u myntri rangbah u la ong ba ki don shibun ki jingmut jingpyrkhat ban leh na ka bynta ka jylla, la ka long ba don kam ban buh thup ia ki jingthoh ha kaba ia dei bad ka jylla shuwa ban ioh ia ka jinglaitluid bad ha dien ba la ioh ia ka jylla ban lum thup ia ki jingthoh ki dur haba ia dei bad jingpynkhreh ia ka jylla ban rakhe ia ka jingdap 50 snem jong ka jylla bad la kyntu ia ka DIPR ba kan leh ia kane bad dei ban sdang noh naduh mynta.
Ban pynsah nam ia kane ka sngi rakhe ia ka “Meghalaya Day” ka sorkar kala rai ban pyntrei kam ia ka “100 Days programme”, kum ka nuksa u la ong ban wanrah ia ka jingkylla hapoh secretariat da kaba pyndon kam ia ki Led Light bad ia kane yn sa leh ha ka dur jong ka NPP mode bad kane ka long ruh na ka bynta ki Street Light ban pyndon kam noh da ki Led namar ki Led Light kin bam duna ka light.
La ong ba ha kine ki shispah sngi ka sorkar kan wanrah ia ki kali kiba pyndon kam ia ki kali ban pyndon kam ia ka light bad ia kane yn don lai saw tylli ki jaka sharge ia ki kali bad kane kan long ruh ia kiwei kiwei ki tnad sorkar ba dei ban lah ban leh ei ei hapoh kine ki shispah sngi. Ban leh ia kane ki ophisar ki dei ban leh ei ei ban pyni ba ka sorkar ka don ka jingkut jingmut ban trei na ka bynta ki paidbah ka jylla.
Kawei ka kam kaba ka sorkar ka leh ka long ka jingiadei bad ka sorkar pdeng la ka long ha kano kano ka rukom, hynrei mynta yn ia trei lang bad ki jylla kiba heh na ka bynta ban lah ban khring ia ki jylla kiba heh ba kin wan ban dei pisa sha kane ka jylla, ha kaba ka jylla kan ia trei lang bad kiwei ki jylla ban ia ioh jingtip kiba mar kylliang.
Ha kane ka sngi u myntri rangbah u la ong ba kaei kaba ngi don lang baroh ka long ban trei na ka bynta ka jylla la ka long ha kano kano ka bynta kaba rit kaba leh, u la ong ba dei ban sngew sarong ia la ka jong ka jingleh bad dei ban dang iai beteng ia kane ka jingtrei shitom u la ai khublei ia baroh ki bala ioh ia ka burom ha kane ka sngi.
U myntri rangbah u la ong ba kam dei kaba suk ban rah ia ka jylla sha jrong, kumba la kdew da u Chief Secretary bad u myntri ka tnad pathai khubor, hynrei lada long kiba iashah bad trei shitom yn sa lah ban leh ia kaei kaba angnud. U myntri rangbah u la ong ba ki paidbah ki im sha ki nongkyndong bad ka jingdon ia ki seng treilang kan long ka jingjop ha kaba kyntiew ia ka ioh ka kot bad ka sorkar mynta kan iarap ia ki seng treilang ha kaba kyntiew ia ka ioh ka kot. U la kyntu ia ki ophisar baroh ba ki lah ban trei shitom ban lah ban pynurlong ia ki jingtrei kam.
U myntri ka tnad ka koit ka khiah jong ka jylla u Bah AL Hek u la ong ba wat la bun ki kam la leh, ha ka liang ka pule ka puthi ka koit ka khiah bad ha ka rep ka riang ha kine ki snem kiba la dep, hynrei dang bun kiba dang hap ban leh. U la ong bas a tang lai snem nangne sha khmat ka jylla kan sa rakhe ia ka jingdap 50 snem.
Ia ka jingkren pdiang burom ha kane ka sngi rakhe ia ka Meghalaya Day da u Chief Secretary jong ka jylla u Y Tshering, ha kane ka sngi la don bun ki ophisar na ki tnad sorkar bapher bapher, kumjuh ki rangbah shnong jong kane ka nongbah Shillong, ia kane ka jingrakhe la pynlong ha Soso Tham Auditorium, shillong.
