Shillong, Nailur 12: U myntri rangbah ka jylla u Conrad K Sangma mynta ka sngi u la leit ban jurip da lade ia ka jaka bret nuit jong ka sor Tura kaba don ha Rongkhon, Songgital. Ha kane ka jingleit u myntri rangbah u la ai ka jingkular ban leh ei ei ban weng ia kane ka jingbret nuit pathar.
Mynta ka sngi hi, u myntri rangbah ka jylla u la bethah ba dei ban pyniakhlad ia ki nuit haba ki plastic bad ki bym dei plastic, u la ong ba dei ban lum ia ki plastic bad ia ki yn pyndon kam ha kaba siang rong surok.
Ha kane ka jingleit ban jurip ia katei ka jaka theh nuit ha Rongkhong u myntri rangbah ka jylla u la ia kren bad ki paidbah nongshong shnong kiba don sawdong jong kane ka jaka theh nuit ban sngap ia ka jingeh kaba ki don na ka daw jong ka jingsaphred jong ki nuit na kane ka jaka bret nuit.
Ha kane ka jingiakynduh, na ka liang jong ki paidbah kila ai ka dorkhas sha u myntri rangbah ban kyntu ia ka sorkar ba ka dei ban leh ei ei ban weng ia kane ka jingeh kaba ki paidbah ki ia kynduh. U myntri rangbah u la ai ka jingkular ba ka sorkar kan sa wad ia ki lad ki lynti ban weng ia kane ka jingeh.
Ha kane ka jingleit jurip ia kane ka jaka theh nuit la synrang lang ia u myntri rangbah da u Joint Secretary ba dei jong u myntri rangbah ka jylla u Arun Kumar Khembhavi, u Bah CVD Diengdoh bad u Deputy Commissioner jong ka West Garo Hills u Ram Singh.
